Milli Bank istehlakçıları fırıldaqçılıq sxemi barədə xəbərdar edir

Milli Bank istifadəçiləri fırıldaqçılıq sxemi barədə xəbərdar edir.

Son dövrlərdə bir neçə hal qeydə alınıb ki, naməlum şəxslər “WhatsApp” mobil tətbiqi və digər kommunikasiya vasitələri ilə vətəndaşlarla əlaqə saxlayaraq özlərini Gürcüstan Milli Bankının nümayəndələri kimi təqdim edirlər. Bununla yanaşı, onlar qanunsuz şəkildə Milli Bankın loqosundan istifadə edirlər.

Milli Bankın məlumatına görə, həmin şəxslər vətəndaşlara guya Milli Bank qarşısında mövcud kredit öhdəliklərinin ödənilməsi və digər oxşar maliyyə əməliyyatlarında kömək təklif edirlər.

Qurumun bildirdiyinə görə, hallardan birində vətəndaşa onun şəxsi bank məlumatlarına mümkün icazəsiz giriş və kreditin aktivləşdirilməsi cəhdi barədə məlumat verilib. Daha sonra yoxlama aparmaq adı ilə ondan identifikasiya məlumatlarından istifadə edərək internet və ya mobil banka daxil olması tələb edilib.

Bildirilib ki, bu cür əlaqələr zamanı fırıldaqçılar istifadəçilərdən internet və ya mobil bank xidmətlərinə giriş üçün lazım olan məlumatları, o cümlədən istifadəçi adı, parol, eləcə də digər şəxsi və maliyyə məlumatlarını təqdim etməyi istəyirlər.

Milli Bank xəbərdarlıq edir ki, bu məlumatların təqdim edilməsi fırıldaqçıların bank hesablarına giriş əldə etməsinə, icazəsiz əməliyyatlar aparmasına və istifadəçilərin maliyyə itkisi ilə üzləşməsinə səbəb ola bilər.

Gürcüstan Milli Bankı vətəndaşları diqqətli və ehtiyatlı olmağa, şəxsi və maliyyə məlumatlarını, o cümlədən internet və mobil bank xidmətlərinə giriş üçün istifadəçi adı və parolu heç kimlə paylaşmamağa çağırır.

Həmçinin vətəndaşlara naməlum şəxslər tərəfindən göndərilən şübhəli keçidlərə daxil olmamaq və həmin linklər vasitəsilə bank və ya kart əməliyyatları həyata keçirməmək tövsiyə olunur.

Belə hallarla qarşılaşan şəxslər müvafiq hüquq-mühafizə orqanlarına müraciət etməlidirlər.

Milli Bank qeyd edib ki, maliyyə sektoru istifadəçilərinin hüquqlarının qorunması məqsədilə maliyyə fırıldaqlarının geniş yayılmış sxemləri ilə bağlı mütəmadi olaraq xəbərdaredici və maarifləndirici məlumatlar yayımlayır.