Mixeil Saakaşvili – Tamamilə rüsvayçı şəkildə, “Gürcü Beynəlxalq Şəffaflıq” məni siyasi məhbuslar siyahısına daxil etmədi, ümid edirəm ki, bu ədalətsizliyə səs qaldıracaq dürüst QHT-lər də tapılacaq

Tamamilə rüsvayçı şəkildə, “Gürcü Beynəlxalq Şəffaflıq”, əsarətimin beşinci ilində məni siyasi məhbuslar siyahısına daxil etmədi. Əslində, bu məni bir dəqiqə də olsun təəccübləndirmədi. Məhz gürcü qeyri-hökumət sektoru mənim islahatçı hökumətimin nüfuzdan düşməsinə və İvanişvilinin hakimiyyətə gəlməsinə böyük töhfə verdi. Bu qədər il ərzində bu xadimlər tamamilə həyasızcasına buna görə heç bir məsuliyyət götürmürlər, üstəlik, bu günə qədər İvanişvilinin gəlişində məni günahlandırırlar – bu haqda Gürcüstanın sabiq prezidenti Mixeil Saakaşvili sosial şəbəkədə yazıb.

Saakaşvilinin qeyd etdiyi kimi, qeyri-hökumət təşkilatları məhz bu sükutları ilə diktaturanın formalaşmasına böyük töhfə veriblər.

“Yaxşı, tutaq ki, bu qədər il gözlərinizi yumurdunuz və rus rejimini gətirdiyinizi anlamırdınız. Məgər son iki il Saakaşvili kompleksindən azad olmaq və heç olmasa indi əsas siyasi məhbusun, rejim və Rusiya üçün əsas problemin məhz mən olduğumu etiraf etmək üçün kifayət etmədimi?

Bu qeyri-hökumət təşkilatları siyasətin yenilənməli olduğunu bəyan edirlər, lakin onların rəhbərləri nədənsə 15-20 ildir ki, rahat həyatları ilə bu təşkilatların rəhbər vəzifələrində əyləşiblər. Məhz buna görə də xalq arasında heç bir nüfuzunuz yoxdur, xalq sizi qeyri-səmimi, səmərəsiz qrant yeyənlər hesab edir.

Və necə oldu ki, istinad etdiyiniz Avropa Şurası öz çoxsaylı qətnamələrində məni siyasi məhbus və Putinin şəxsi dustağı kimi adlandırır, eyni şey Avropa Parlamentinə və “Amnesty International”a da aiddir, lakin siz məni eyni kateqoriyalara aid etmirsiniz?

“Gürcü Arzusu”nun ilk illərindən müxalifətin kütləvi siyasi təqibinə səs çıxarmadınız, “məhkəmə islahatının bir neçə dalğasını” tərifləyirdiniz. 2018-ci ilin prezident seçkilərindəki zorakılığa və kütləvi rüşvətə, 2020-ci ilin saxtalaşdırılmasına səs çıxarmadınız.

Məhz bu sükutunuzla diktaturanın formalaşmasında böyük töhfəniz var və yeri gəlmişkən, diktatura sözünü işlətməkdən nümayişkaranə şəkildə bu günə qədər qaçırsınız.

Bu gün yaranmış vəziyyətdə öz məsuliyyətinizi etiraf etməyincə, öz səhvlərinizi, o cümlədən indi mənə qarşı edilən cinayətkar səhvi — guya həqiqətən pencək aldığıma görə əsarətdəyəm və indi məni siyasi bəyanatlarıma görə mühakimə etmirlər — etiraf etməyincə, Gürcüstanda heç bir ciddi rol oynaya bilməyəcəksiniz.

Bütün ədalətli insanlardan xahiş edirəm ki, bu yalançı “Şəffaflığa” layiq olduğu cavabı versinlər, ar olsun onlara.

PS. “Transparency” yeni bir izahat verib ki, siyasi məhbuslar siyahısına yalnız bəyanatlarına və aksiyalara görə həbsdə olanları daxil etmişik.

Burada da yalan deyirlər, indi məni məhz bəyanatlarıma və aksiyalara çıxış çağırışlarıma görə “sabotaj işi” üzrə mühakimə edirlər, lakin bu, onların nəzərindən qəsdən qaçıb. Ümid edirəm ki, bu ədalətsizliyə səs qaldıracaq dürüst QHT-lər də tapılacaq” – Mixeil Saakaşvili yazır.