Gürcüstan prezidenti Mixeil Qavelashvili Türkiyə prezidenti Rəcəb Tayyib Ərdoğanı 4 sentyabrda Gürcüstan–Türkiyə milli komandalarının futbol matçına dəvət edib.

Bu barədə Mixeil Qavelashvili Türkiyədə ölkə prezidenti ilə birgə keçirilən brifinqdə bildirib.

“İsti qonaqpərvərliyiniz üçün təşəkkürümü bildirirəm və, bəli, sizi Gürcüstana dəvət etmişdim, amma yaxşı olardı ki, 4 sentyabrda Gürcüstan–Türkiyə matçına gəlib bizimlə birgə izləyəsiniz. Əminəm ki, çox maraqlı oyun olacaq”, – deyə Mixeil Qavelashvili bildirib.

Eyni zamanda, Türkiyə prezidenti brifinqdə qeyd edib ki, Gürcüstan–Türkiyə matçı ölkələr arasında münasibətləri daha da dərinləşdirəcək.

“Mən vurğulamaq istəyirəm ki, Gürcüstan və Türkiyənin strateji əməkdaşlığı xalqlarımızın iradəsi əsasında daha da inkişaf edəcək və möhkəmlənəcək. Prezident Qavelashviliyə, onun nümayəndə heyətinə təşəkkür edirəm və Gürcüstanın dost xalqına böyük salamlarımı çatdırıram. Komandalarımızın görüşü 4 sentyabrda keçiriləcək və bu, seçmə mərhələ oyunu olmaqla yanaşı, ölkələrimiz arasında dost münasibətləri daha da dərinləşdirəcək”, – deyə Rəcəb Tayyib Ərdoğan bildirib.

Gürcüstan milli komandası Boris Payçadze adına Dinamo Arenada dünya çempionatının seçmə mərhələ matçını keçirəcək. Görüş saat 20:00-da başlayacaq.