Gürcüstan Prezidenti Mixeil Kavelaşvili əhalini qarşıdan gələn 2026-cı il münasibətilə təbrik edib.
Prezidentin qeyd etdiyi kimi, 2025-ci ildə gürcülər özlərinə xas olan möhkəmliyi nümayiş etdirdilər, ölkənin suverenliyini və milli maraqlarını qorudular.
“Əziz həmvətənlərim! Bu gün, köhnə ilin tarixə qovuşub yeninin qapılarını açdığı bu xüsusi anlarda sizə böyük qürur, minnətdarlıq hissi və gələcəyə ümidlə müraciət edirəm. 2025-ci il həm sınaqlar, həm də mənəvi güc ili oldu. Xalqımız bizə xas olan unikal xarakteri və möhkəmliyi ortaya qoydu, görünməmiş təzyiqlərə dözdü, ölkənin suverenliyini və milli maraqlarını qorudu ki, bu da kimliyimizin, inancımızın və ənənələrimizin yaşadılması deməkdir. Məhz bu ruh və Vətənə sonsuz sevgi ilə 2026-cı ili qarşılayırıq”, – deyə Gürcüstan Prezidenti vurğulayıb.
Mixeil Qavelashvili qarşıdan gələn Yeni il münasibətilə abxaz və osetin bacı-qardaşlarını, xaricdə yaşayan həmvətənləri, ölkənin daha yaxşı gələcəyi naminə çalışan müxtəlif peşə sahiblərini və Gürcüstan Pravoslav Kilsəsini təbrik edib.
“Səmimi sevgi və həsrətlə qarşıdan gələn Yeni il münasibətilə abxaz və osetin bacı-qardaşlarımızı, eləcə də xaricdə yaşayan həmvətənlərimizi təbrik etmək istəyirəm. Xüsusilə Gürcüstan Pravoslav Kilsəsini, onun Müqəddəsliyini – Gürcüstanın Katolikos-Patriarxını, xalqımızın mənəvi dayağını, iman, əxlaq və milli birliyin keşiyində duran şəxsiyyəti təbrik edir və ona təşəkkürümü bildirirəm. Ölkəmizin sadiq övladları olan bütün konfessiyaların nümayəndələrini təbrik edirəm. Böyük hörmətlə Gürcüstan Müdafiə Qüvvələrini və hüquq-mühafizə orqanlarını təbrik edirəm; onlar vətəndaşlarımızın və Vətənimizin təhlükəsizliyini ləyaqət və sədaqətlə qoruyurlar. Yeni il münasibətilə ölkəmizin daha yaxşı gələcəyi üçün çalışan müxtəlif peşə sahiblərini təbrik edir və onlara təşəkkür edirəm. Əziz dostlar, hər bir həmvətənə və hər bir ailəyə vahid, güclü, ədalətli və sülhsevər Gürcüstanda sağlamlıq, rifah və xoşbəxtlik arzulayıram. Həmişə inanaq ki, birlikdə istənilən çətinliyin öhdəsindən gələ bilərik. Qarşıdan gələn 2026-cı iliniz mübarək! Tanrı Vətənimizin hamisi olsun!”, – deyə Prezidentin Yeni il təbrikində bildirilir.
