Gürcüstan Prezidenti Mixeil Kavelashvili Slovakiya Respublikasının Prezidenti Peter Pelleqrini ilə görüşüb.

Prezidentin mətbuat xidmətinin məlumatına görə, Slovakiya Prezidentinin sarayında keçirilən təkbətək görüşdə Gürcüstan ilə Slovakiya arasında uğurlu əməkdaşlıq və ölkələr arasında mövcud dialoqun daha da dərinləşdirilməsi müzakirə olunub. İkitərəfli səfərlərin dinamikasının artırılmasının və müxtəlif sahələrdə əməkdaşlığın inkişafının əhəmiyyəti xüsusilə vurğulanıb.

Gürcüstan Prezidenti görüşdə bildirib ki, misli görünməmiş qlobal çağırışlar və risklər dövründə Slovakiya ilə ikitərəfli əməkdaşlığın daha da möhkəmləndirilməsi və beynəlxalq formatlarda qarşılıqlı dəstək Gürcüstan üçün xüsusi əhəmiyyət daşıyır.

Görüş zamanı Mixeil Kavelashvili slovakiyalı həmkarına Gürcüstanın Avropa inteqrasiyası yolunda göstərilən dəstəyə və Gürcüstan–Avropa İttifaqı tərəfdaşlığının qorunması istiqamətində səylərə görə təşəkkür edib.

Prezident qeyd edib ki, Gürcüstan Slovakiyanın ölkənin suverenliyi və ərazi bütövlüyünə verdiyi dəstəyi yüksək qiymətləndirir.

Görüşdən əvvəl Gürcüstan Prezidenti fəxri qonaqlar kitabına qeyd yazıb.

Mixeil Kavelashvili Slovakiya Respublikasında rəsmi səfərdə nümayəndə heyəti ilə birlikdə iştirak edir.

Gürcüstan nümayəndə heyətinin tərkibinə daxildir: Gürcüstan parlamentinin Xarici əlaqələr komitəsinin sədri Nikoloz Samxaradze, Gürcüstan xarici işlər nazirinin müavini Giorgi Zurabaşvili, Gürcüstanın Slovakiya Respublikasındakı fövqəladə və səlahiyyətli səfiri Konstantine Kvaçakidze və Prezident Administrasiyasının nümayəndələri.