Mixeil Ğavelaşvili – Milli təhlükəsizlik dövlətin suverenliyinin, sülhün və inkişaf imkanlarının üzərində dayandığı təməldir
Milli təhlükəsizlik dövlətin suverenliyinin, sülhün və inkişaf imkanlarının üzərində dayandığı təməldir – bu barədə Gürcüstan Prezidenti Mixeil Ğavelaşvili Dövlət Təhlükəsizliyi Xidmətinin 11 illik yubileyinə həsr olunmuş təntənəli tədbirdə çıxışı zamanı bildirib.
Prezidentin bəyanatına əsasən, müasir dünyada milli təhlükəsizlik heç vaxt olmadığı qədər daha geniş anlayışdır və ənənəvi çağırışlarla yanaşı, məqsədi cəmiyyəti bölmək və dövləti zəiflətmək olan hibrid təhdidlər, informasiya müharibəsi, kiberhücumlar və psixoloji təzyiqlə mübarizəni də əhatə edir.
Mixeil Ğavelaşvili çıxışında qeyd edib ki, belə bir şəraitdə Dövlət Təhlükəsizliyi Xidmətinin səmərəli fəaliyyəti xüsusi əhəmiyyət kəsb edir, çünki ölkənin təhlükəsizliyinin qorunması konstitusiya quruluşunun, daxili sabitliyin və cəmiyyətin etimadının möhkəmlənməsi ilə birbaşa bağlıdır.
Prezident Dövlət Təhlükəsizliyi Xidmətinin transmilli cinayətkarlıq, terrorizm və korrupsiyaya qarşı mübarizədə, eləcə də ölkədə destabilizasiya və dövlət çevrilişi cəhdlərinin qarşısının alınması istiqamətindəki roluna diqqət yetirib.
Çıxışının sonunda Gürcüstan Prezidenti ölkənin sülhü və təhlükəsizliyinin qorunması uğrunda canlarını fəda etmiş əməkdaşların xatirəsini ehtiramla yad edib, Dövlət Təhlükəsizliyi Xidmətinin əməkdaşlarına isə peşəkarlıq və ölkə qarşısındakı fədakarlıqlarına görə təşəkkürünü bildirib.
Məlumatı Gürcüstan Prezidentinin Administrasiyası yayır.