Mixeil Ğavelaşvili – Cənab Ərdoğanın yürütdüyü sülh siyasəti məhz bu gün zəruridir və ortaq dəyərlərimizi qoruyur, onlara hörmətlə yanaşırıq

20:39, 12.11.2026

 

Gürcüstan Prezidenti Mixeil Ğavelaşvili Türkiyəyə səfərini yekunlaşdırıb və Türkiyə Prezidenti Rəcəb Tayyib Ərdoğanla görüşünün əhəmiyyətindən danışıb.

Mixeil Ğavelaşvilinin qeyd etdiyi kimi, Türkiyə və Gürcüstanın əsas ölkələr olduğu Orta Dəhlizin inkişafına xüsusilə böyük maraq mövcuddur. O, Ərdoğanla görüşdə Anaklia limanından da bəhs edildiyini bildirib.

“Anaklia limanı ilə bağlı söhbətimiz oldu, Türkiyənin prosesə cəlb olunması arzusu ifadə edildi. Bakı-Tbilisi-Qars dəmir yolu yeniləndikdən sonra iyunun 2-də fəaliyyətə başlayıb və yük dövriyyəsi kifayət qədər geniş miqyasda artır. Bu proseslər hər iki ölkənin maraqlarına cavab verir. Siyasi baxımdan isə ən önəmlisi sülhsevər siyasətin üst-üstə düşməsidir. Türkiyə kimi güclü bir ölkə sülh siyasəti yürüdən dövlət kimi mövqe tutur. BMT-nin İqlim Konfransında Ərdoğanın çıxışında bu, yaxşı görünürdü. Onunla görüşdə də vurğuladım ki, mövcud çağırışlara bizimlə eyni münasibət bəsləyən belə yaxşı qonşumuz var. Bu gün dünyada beynəlxalq hüquq, diplomatik münasibətlər pozulub, dünya çoxqütblü olub və artıq ağırlıq mərkəzləri mövcud deyil. Məhz belə bir dövrdə cənab Ərdoğanın və Türkiyənin yürütdüyü siyasətin aparılması zəruridir. Bu, sülhməramlı, qarşılıqlı hörmətə, qarşılıqlı etimada və ortaq dəyərlərə əsaslanan siyasətdir, biz bunu qoruyur və hörmətlə yanaşırıq. Münasibətlərimizin dinamik inkişafı məhz bunun əks-sədasıdır” – Mixeil Ğavelaşvili açıqlayıb.

Xatırladaq ki, Gürcüstan Prezidenti Mixeil Ğavelaşvili noyabrın 11-də Antalyada BMT-nin İqlim Dəyişikliyi üzrə 31-ci (COP31) Konfransında iştirak edib, bu gün isə Türkiyə Prezidenti Rəcəb Tayyib Ərdoğanla görüşüb.

Oxşar