Tbilisinin Nəqliyyat və Şəhərsalma İnkişaf Agentliyi “Didube”nin yuxarı çıxışının yaxınlığındakı ərazinin səliqəyə salınması məqsədilə yol hərəkətinin təşkili sxemini işləyib hazırlayıb.

Paytaxtın meri Kaxa Kaladzenin Tbilisi Munisipalitetinin hökumətinin iclasında qeyd etdiyi kimi, hazırda ərazidə xaotik vəziyyət mövcuddur, həm piyadalar, həm də nəqliyyat vasitələri hərəkət etməkdə çətinlik çəkirlər.

“Eristavi küçəsi ilə həmsərhəd olan metronun “Didube” stansiyasının yuxarı çıxışının yaxınlığında yerləşən dayanacaq ictimai nəqliyyatın ən vacib qovşaqlarından biridir. Onun əsas funksiyası metronun, avtobusların, mikroavtobusların və sərnişin axınlarının bir-biri ilə effektiv şəkildə bölüşdürülməsini təmin etməkdir. Hazırda orada xaos mövcuddur, piyada normal hərəkət edə bilmir, mikroavtobusların dayanma problemi var, şəxsi avtomobillər xaotik şəkildə park edilib. Bu səbəbdən də bu məkanı səliqəyə salmaq istəyirik ki, piyadalar və nəqliyyat vasitələri üçün hərəkət təhlükəsiz olsun.

Nəqliyyat qovşağı və yaxınlıqdakı ərazinin lazımi qaydada fəaliyyət göstərməsi məqsədilə Tbilisinin Nəqliyyat və Şəhərsalma İnkişaf Agentliyi yol hərəkətinin təşkili sxemini işləyib hazırlayıb. Bu sxem aşağıdakıları nəzərdə tutur: avtobuslar və mikroavtobuslar üçün piyadaların təhlükəsizliyi üçün lazım olan elementlərlə tam təchiz olunacaq müvafiq dayanacaqların qurulması; meydanda ağac və bitkilərin əkilməsi, bu isə ətraf mühitin vizual görünüşünü əhəmiyyətli dərəcədə yaxşılaşdıracaq” – Kaladze bildirib.

O, qeyd olunan ərazidə ictimai nəqliyyatın hərəkət sxeminin də dəyişəcəyini deyib.

“Bundan başqa, qeyd olunan ərazidə hərəkət edən ictimai nəqliyyatın marşrutlarında dəyişikliklər planlaşdırılır. Xüsusilə, avtobuslar son dayanacağa qədər, Eristavi küçəsindən sola dönərək hərəkət edəcəklər. Həmçinin, sola dönməklə Quramişvili prospektinə doğru hərəkət etməyə davam edə biləcəklər. Həmçinin, layihə, Tsereteli prospektindən “Didube”nin yuxarı çıxışına yaxın yerləşən dayanacağa qədər avtobuslar üçün ayrıca zolağın qurulmasını nəzərdə tutur, bu isə hərəkət zamanını və rahatlığı xeyli yaxşılaşdıracaq. Qeyd olunan dəyişikliklər nəqliyyat sisteminin effektivliyini artıracaq və hərəkət keyfiyyətini əhəmiyyətli dərəcədə yaxşılaşdıracaq” – Kaxa Kaladze qeyd edib.