Məktəb dərslikləri dövlət məktəblərinə və təhsil resurs mərkəzlərinə sentyabrın 10-dək çatdırılacaq

“Təhsil Resursları” MMC tərəfindən 2026-cı il üzrə konsolidə edilmiş tender çərçivəsində dövlət məktəbləri və təhsil resurs mərkəzləri üçün məktəb dərsliklərinin mərhələli şəkildə çatdırılması ən geci sentyabrın 10-dək başa çatdırılacaq. Bu barədə “Təhsil Resursları” məlumat yayıb.
Onların məlumatına görə, çap və distribusiya prosesi 32 adda tədris nəşrini və ümumilikdə 1 533 339 nüsxəni əhatə edir. Bunlardan 1 340 044 nüsxə birbaşa dövlət məktəblərinə veriləcək.

“Məktəb dərslikləri pulsuz olaraq aşağıdakı şəxslərə təqdim ediləcək:

dövlət məktəblərinin şagird və müəllimlərinə;
sosial cəhətdən həssas ailələrin vahid məlumat bazasında qeydiyyatda olan və ailələrinin reytinq balı hər il martın 1-nə 70 001 baldan aşağı olan özəl məktəb şagirdlərinə;
Axalqori bələdiyyəsinin işğal olunmuş ərazilərində yerləşən və tədrisin gürcü dilində aparıldığı məktəblərin şagird və müəllimlərinə;
işğal olunmuş Qali rayonunun İnquri çayına bitişik 9 məktəbin şagird və müəllimlərinə, həmçinin işğaldan əvvəlki Qali rayonunun sərhədləri daxilində bərpa edilmiş və fəaliyyət göstərən məktəblərin I sinif şagird və müəllimlərinə. Onlara II–XI siniflər üçün gürcü dili və ədəbiyyatı, Gürcüstan tarixi və Gürcüstan coğrafiyası dərslikləri veriləcək;
özəl məktəblərin I sinif şagirdlərinə — yalnız “Dedaena” dərsliyi;
2008-ci ilin avqust müharibəsində həlak olmuş döyüşçülərin övladları olan özəl məktəb şagirdlərinə;
nazirliyə və nazirlik sisteminə daxil olan publik hüquqi şəxslərə — onların tələbinə uyğun olaraq.
Ölkə üzrə məktəblər üçün məktəb dərsliklərinin çatdırılması yaxın günlərdə “Təhsil Resursları” MMC tərəfindən mərhələli şəkildə həyata keçiriləcək”, – deyə “Təhsil Resursları”nın yaydığı məlumatda bildirilir.