Medianın məlumatına görə, Rusiya xarici işlər nazirinin müavini NATO-ya üzv ölkələrin Moskva ilə hərbi münaqişəyə hazırlaşdığını bildirir

Rusiya xarici işlər nazirinin müavini Aleksandr Qruşkonun sözlərinə görə, NATO-ya üzv ölkələr Moskva ilə hərbi münaqişəyə hazırlaşırlar. Rusiya mediasının məlumatına görə, Qruşko bu barədə Şərq İqtisadi Forumunda çıxışı zamanı bildirib.
Onun sözlərinə görə, Şimali Atlantika Alyansı ölkələrinin dediklərinə və əməllərinə diqqət yetirsək, söhbətin Rusiya ilə müharibəyə hazırlıqdan getdiyini görərik.
Aleksandr Qruşko Arktikada baş verən proseslərdən də danışıb və bildirib ki, Qərb Rusiyaya qarşı hibrid müharibəyə başlayıb, lakin heç vaxt hərbi üstünlük əldə edə bilməyəcək.
“Bu gün biz açıq şəkildə görürük ki, Qərb ölkələri Arktika regionunu geosiyasi rəqabət zonası elan ediblər. Bir müddət əvvəl nədənsə onlar bu barədə heç bir açıqlama vermirdilər, amma indi qəfildən qərara gəliblər ki, bura geosiyasi rəqabət zonasıdır və rəqabət qabiliyyətini təmin etmək üçün Qərbin hərbi üstünlük əldə etməsi lazımdır”, – Rusiya xarici işlər nazirinin müavini bildirib.
Məlumat üçün bildirək ki, Danimarka yeni genişləndirilmiş hərbi çağırış proqramı çərçivəsində çağırışçıları Qrenlandiyaya göndərib. Medianın yazdığına görə, krallığın məqsədi əsgərlərin ölkənin strateji baxımdan ən mühüm və çətin regionunda təlim keçməsidir.