Associated Press agentliyinin yaydığı məlumata görə, Tehran şəhərinə endirilən zərbələr nəticəsində İranın paytaxtı üzərində qara tüstü müşahidə olunub.

Media həmçinin yazır ki, daha əvvəl İsrail Müdafiə Qüvvələri “Tehranın mərkəzinə növbəti zərbələr dalğası endirdiklərini” açıqlayıb. Bildirilib ki, hücumlar “İranın terrorçu rejiminin onlarla hərbi infrastruktur obyektinə” yönəlib.

Reuters agentliyinin məlumatına görə, zərbələr İran tərəfindən də həyata keçirilib.

Medianın yazdığına görə, İranın İsrail istiqamətinə, o cümlədən Tel Aviv şəhərinə raketlər buraxmasından sonra ölkədə hava həyəcan siqnalları və müdafiə sistemləri bir neçə dəfə işə düşüb.

Reuters bildirir ki, İsrailin xilasetmə qrupları Petah Tikva şəhərində İrandan buraxılan raketin ələ keçirilməsi nəticəsində düşən qalıqların vurduğu ziyanı araşdırıblar. Məlumata görə, hadisə nəticəsində ölən olmayıb.

Verilən məlumata əsasən, İran mərkəzi İsrail istiqamətində ardıcıl olaraq təxminən 10 raket buraxıb. Bu, yəhudilərin ilin ən müqəddəs bayramlarından biri olan Pesax bayramının ilk gecəsini qeyd etməyə hazırlaşdığı vaxta təsadüf edib. Buna görə də bəzi İsrail ailələri bayramı sığınacaqlarda qeyd etməli olublar.