Vaşinqtonda ABŞ dövlət katibi Marko Rubio və Ermənistanın xarici işlər naziri Ararat Mirzoyanın görüşü keçirilib.

ABŞ Dövlət Departamentinin məlumatına əsasən, liderlər görüş zamanı “Beynəlxalq Sülh və Rifah üçün Tramp Marşrutu” (TRIPP) layihəsinin həyata keçirilməsi üçün çərçivə sənədini təqdim ediblər.

“Çərçivə sənəd TRIPP-in tətbiqi üçün Ermənistan ərazisində maneəsiz multimodal tranzit əlaqəsinin qurulması məqsədinə xidmət edən konkret yol müəyyən edir. Azərbaycanın əsas hissəsini Naxçıvan Muxtar Respublikası ilə birləşdirməklə və Transxəzər ticarət marşrutunda həyati əhəmiyyəti ilə birlikdə, TRIPP-in Ermənistan Respublikası üçün beynəlxalq və dövlətlərarası əlaqənin qarşılıqlı faydalarını yaratması gözlənilir” – Dövlət Departamentinin bəyanatında deyilir.

Sənədə əsasən, Ermənistan TRIPP-in tikintisi üçün uzunmüddətli müstəsna hüquqları ABŞ tərəfindən nəzarət edilən şirkətə 49 il müddətinə verəcək və bu müddət əlavə 50 il uzadıla bilər.

“TRIPP-in əsas məqsədi regional ticarət və əlaqələrin genişləndirilməsi, eləcə də Mərkəzi Asiya və Xəzər dənizini Avropa ilə birləşdirən yeni tranzit imkanlarının yaradılması yolu ilə Ermənistan və Azərbaycanın rifahını və təhlükəsizliyini gücləndirmək, həmçinin Amerika ticarətini inkişaf etdirməkdir” – ABŞ Dövlət Departamentinin bəyanatında deyilir.