Konkret olaraq nə etməyi planlaşdırdığımızla bağlı bu gün heç bir bəyanatım yoxdur, lakin məsələ müzakirə olunur – bu barədə ABŞ dövlət katibi Marko Rubio Konqresin Nümayəndələr Palatasının Xarici İşlər Komitəsi qarşısında çıxışı zamanı konqresmen Co Uilson tərəfindən verilən suala cavabında deyib.

Co Uilson “Gürcü Arzusu”na münasibətdə Dövlət Departamentinin nə etməyi planlaşdırdığı ilə maraqlanıb.

“Tramp administrasiyasının Gürcüstanda anti-Amerika “Gürcü Arzusu” rejiminə qarşı qəti mövqeyinə görə minnətdaram. Onlar oktyabrın 26-da Gürcüstanda seçkiləri saxtalaşdırdılar. Onlar Amerika ilə assosiasiyanı kriminallaşdırdılar. Onlar Amerika şirkətlərini qovdular, ticarəti və Orta Dəhlizdə faydalı qazıntıların əlçatanlığını blokladılar, Gürcüstanı Çin Kommunist Partiyasına satdılar. Onlar dəfələrlə prezident Trampı və ABŞ rəhbərliyini təhqir etdilər. Bunu nəzərə alaraq, Rondel Fondu ilə birlikdə, Çin Kommunist Partiyasının Gürcüstandakı nəzarətinə işarə edən hesabat yayımlandığı üçün çox minnətdaram və istəyirəm bunu qeyd üçün təqdim edim. Bundan başqa, 200 gün ərzində, azadlığı sevən gürcülər qəhrəmancasına küçələrə çıxırlar, Amerika bayraqlarına bürünürlər və Prezident Trampın posterlərini daşıyırlar. Sizin rəhbərliyinizlə, Dövlət Departamenti Gürcüstan xalqı adından anti-Amerika “Gürcü Arzusu”nun real nəticələrlə üzləşməsi üçün nə edəcək?” – Co Uilson Rubioya müraciət edib.

Marko Rubio cavab olaraq qeyd edib ki, milli maraqlar ABŞ-nin məqsədidir.

“İstənilən digər məsələ kimi, mən giriş bəyanatımda dediklərimə geri qayıdacağam, bizim milli maraqlarımız Birləşmiş Ştatların məqsədidir. Buna görə də biz bu məsələyə baxacağıq və deyəcəyik: dünyanın vacib hissəsində anti-Amerika hökumətinin mövcudluğu bizim milli marağımıza uyğundurmu? və əgər deyilsə, bu hökumətin bədəl ödəməsi üçün tədbirlər görəcəyik. Bu məsələ hazırda müzakirə prosesindədir, biz variantlar və əlavə imkanlar axtarırıq. Konkret olaraq nə etməyi planlaşdırdığımızla bağlı bu gün heç bir bəyanatım yoxdur, lakin deyə bilərəm ki, bu məsələ müzakirə olunur və bir daha deyim ki, bu, hökumətin, anti-Amerika hökumətinin ən çox reaksiya verəcəyi hansı tədbirlərin daha təsirli olacağına dair tövsiyələr almaq üçün regional bürolarımız və yerli ofislərimizə niyə müraciət etməyimizin əla nümunəsidir” – Marko Rubio bildirib.