ABŞ dövlət katibi Marko Rubio Donald Trampın Vladimir Putinlə Budapeştdə planlaşdırılan görüşü ləğv etməsinə baxmayaraq, Amerika Birləşmiş Ştatlarının yenə də Rusiya ilə görüşməyə hazır olduğunu bildirib.

Rubio jurnalistlərlə söhbəti əsnasında qeyd edib ki, əgər sülhə nail olmaq imkanı olarsa, ABŞ hər zaman Rusiya ilə təmasda maraqlı olacaq.

“Biz hələ də ruslarla görüşmək istəyirik. Xarici işlər naziri Lavrovla yaxşı telefon danışığım oldu və bu dialoqu davam etdirəcəyik. Əgər sülhə nail olmaq imkanı olarsa, biz hər zaman təmasda maraqlı olacağıq” – Rubio bildirib.

ABŞ Prezidentinin Putinlə görüş haqda qərarını niyə dəyişməsi və niyə Rusiyaya sanksiyalar tətbiq etməsi haqda suala Marko Rubio belə cavab verib: “Prezident bir neçə ay ərzində dəfələrlə bəyan etmişdi ki, sülh sazişinə nail olunması prosesində irəliləyiş olmazsa, müəyyən mərhələdə nəsə etməyə məcbur qalacaq. Bu gün onun məhz hərəkətə keçməyə qərar verdiyi gün idi” – Marko Rubio qeyd edib.