Marko Rubio bəyan edir ki, təhlükəsizliklə əlaqəsi olmayan xarici yardım regional bürolarda birləşdiriləcək, USAID-in qalan funksiyaları da müxtəlif bürolar arasında bölüşdürüləcək

Təhlükəsizliklə əlaqəli olmayan bütün xarici yardımlar regional bürolarda birləşdiriləcək. Bu bürolar ABŞ-ın xarici siyasətinin konkret coğrafi ərazilərdə həyata keçirilməsinə cavabdeh olacaqlar – bu barədə ABŞ-ın dövlət katibi Marko Rubionun “Yeni Dövlət Departamenti – yeni dövrün çağırışları üçün” adlı məqaləsində qeyd olunur.

Rubio məqaləsində bildirir: “Bu yanaşma təmin edəcək ki, Dövlət Departamentinin bütün bürolarının və ofislərinin dəqiq məsuliyyət sahəsi və missiyası olsun.”

“Əgər məsələ Afrikaya aiddirsə, bununla Afrikanın işləri üzrə büro məşğul olacaq. İqtisadi siyasət iqtisadi inkişaf, enerji və ətraf mühitin qorunması məsələləri üzrə dövlət katibinin müavininin tabeliyinə veriləcək, təhlükəsizlik yardımı və silahların nəzarəti isə silahların nəzarəti və beynəlxalq təhlükəsizlik üzrə dövlət katibinin müavininin səlahiyyətlərinə daxil ediləcək. İndiyə qədər üst-üstə düşən mandatlar və ziddiyyətli məsuliyyətlər ideoloji təsirlər və mənasız daxili çəkişmələr üçün əlverişli mühit yaradırdı. Şişirdilmiş büdcə və qeyri-müəyyən mandatla vətəndaş təhlükəsizliyi, demokratiya və insan hüquqları məsələləri ilə məşğul olan keçmiş müavin (daxili dairələrdə ‘J ailəsi’ kimi tanınır) aktivistlər üçün əlverişli şərait yaratmışdı ki, onlar ‘insan hüquqları’nı və ‘demokratiya’nı yenidən təyin etsinlər və vergi ödəyicilərinin hesabına öz layihələrini həyata keçirsinlər – hətta bu layihələr dövlət katibi, prezident və Amerika xalqının məqsədləri ilə ziddiyyət təşkil etsə belə,” – deyilir məqalədə, hansı ki, ABŞ Dövlət Departamentinin rəsmi saytında yayımlanıb.

Məqalədə həmçinin vurğulanır ki, USAID-in qalan funksiyaları da müxtəlif bürolara paylanacaq.