NATO-nun baş katibi Mark Rutte bildirir ki, Rusiya tərəfindən gecə həyata keçirilən kombinə edilmiş hücum Moskvanın real sülh danışıqlarına sadiq olmadığını bir daha təsdiqləyib.

Rutte Ali Radada çıxış edərək, 4 və 5 fevral tarixlərində Əbu-Dabidə keçiriləcək ABŞ, Rusiya və Ukrayna arasında bir sonrakı üçtərəfli danışıqlardan da bəhs edib.

“Burada əhəmiyyətli irəliləyiş əldə edilib. Lakin Rusiya dünən gecə olduğu kimi hücuma davam edir. Bu, onların sülhə ciddi yanaşmadıqlarını göstərir” – NATO-nun baş katibi bildirib.

Bununla yanaşı, Mark Rutte Qərb tərəfdaşlarının Rusiyaya təzyiq göstərməyə və Ukraynanı dəstəkləməyə davam edəcəklərini bildirib.

Rutte həmçinin qeyd edir ki, ukraynalıların dostları, eləcə də ukraynalıların özləri “ikinci Budapeşt Memorandumunu və ya başqa bir “Minski” istəməzdilər”.

“NATO gələcək illər ərzində Ukraynanın yanında olacaq. Sizin təhlükəsizliyiniz bizim təhlükəsizliyimizdir, sizin əmin-amanlığınız bizim əmin-amanlığımızdır və bu, ədalətli, davamlı olmalıdır” – NATO-nun baş katibi Ukraynanın Ali Radasında çıxışında deyib.

Məlumat üçün bildirək ki, Mark Rutte fevralın 3-də Ukraynanın paytaxtına gedib. Rutte Ukrayna Prezidenti Volodimir Zelenski ilə birlikdə Kiyevdə Milli Xatirə Xalq Abidəsinə əklil qoyub, ölkələrini müdafiə etmək üçün canlarını fəda edən qəhrəmanları yad edib.