Mariamoba bayramı Sioni Patriarxal Katedralında qeyd olunub [FOTO]

Gürcüstan Pravoslav Kilsəsi 28 avqustda Məryəmin vəfatı – Mariamoba bayramını qeyd edir.
Mariamoba bayramı ilə əlaqədar Ümumdünya Gürcüstan Patriarxı, Mtsxeta-Tbilisi arxiyepiskopu və Biçvinta və Sxinvali-Abxaziya mitropoliti Şio Tbilisidəki Sioni Patriarxal Katedralında ilahi liturgiya keçirir.
İbadət mərasimi saat 10:00-da başlayıb.
Xristian dünyasında Müqəddəs Üçlükdən sonra ən çox ehtiram göstərilən müqəddəs simalardan biri İsa Məsihin anası Məryəmdir. Böyük on iki bayramdan üçü – Məryəmin doğumu, vəfatı və məbədə gətirilməsi – birbaşa Müqəddəs Məryəmə həsr olunub.
Kilsə təliminə əsasən, İsa Məsihin çarmıxa çəkilməsi və dirilməsindən sonra Məryəm tez-tez Tanrıya dua edərək ruhunun tezliklə Səmavi Padşahlığa qəbul olunmasını istəyib. Bir dəfə Xilaskarın məzarı yanında dua edərkən baş mələk Qabriel əlində zeytun budağı ilə Məryəmə görünərək üç gün sonra dünyadan köçəcəyini xəbər verib.
Rəvayətə görə, Məryəmin istəyinə uyğun olaraq, Tanrı təbliğ üçün müxtəlif yerlərə getmiş müqəddəs həvariləri onun vəfatı günü vidalaşmaq üçün bir araya gətirib.
Üçüncü saatda, yəni təxminən səhər saat 09:00-da, Məryəmin bu dünyadan köçməsi zamanı onun uzandığı otaq möcüzəvi bir nurla işıqlanıb. Müqəddəs Məryəmin cənazəsi Sion dağından Getsemani bağına aparılıb.
Kilsə təliminə görə, İsa Məsih anasının müqəddəs və pak ruhunu göylərə yüksəldib. Müqəddəs Məryəm həyatının son illərini Sion dağında keçirdiyinə görə, onun vəfatına həsr olunan məbədlər Sioni adlandırılır.