Mayın 27-dən Qazaxıstanın “Air Astana” aviaşirkəti Tbilisi Beynəlxalq Hava Limanında yeni istiqamət açır – aviaşirkət Atırau -Tbilisi istiqamətində uçuşları həftədə üç reys tezliyi ilə həyata keçirəcək. İqtisadiyyat nazirinin müavini Mariam Kvrivişvilinin qiymətləndirməsinə əsasən, Atırau ilə Tbilisi arasında hava əlaqəsinin əlavə edilməsi qazax turistlərin Gürcüstanın turizm məhsullarına tələbatının artması faktını vurğulayır.

“Qazaxıstan Gürcüstan üçün ən sürətlə inkişaf edən turizm istiqamətlərindən biridir. Qazaxıstandan daha çox turist cəlb etmək üçün ölkəmiz fəal şəkildə tanıdılır və qeyd etmək lazımdır ki, ötən il Qazaxıstandan gələn turistlər baxımından çox uğurlu olub. Sevindirici haldır ki, “Air Astana” və “FlyArystan” həm Tbilisi, həm də Kutaisi beynəlxalq hava limanlarına uçuşlar həyata keçirəcəklər və Atıraudan yeni istiqamət əlavə edilir, bu da qazax turistlərin Gürcüstanın turizm məhsullarına tələbatının artması faktını vurğulayır” – Mariam Kvrivişvili bildirib.

Qeyd edilməlidir ki, 2024-cü ildə Qazaxıstandan 178 930 beynəlxalq ziyarətçi Gürcüstana səfər edib, qazax aviaşirkətlərinin payı isə bazarın 3,9%-ni təşkil edib.

“Qazax aviaşirkəti yeni istiqamət əlavə edir və artan tələblə əlaqədar əlavə tezliklər həyata keçirəcək, bu da turist axınlarını daha da artıracaq, daha çox turist məsrəfi gətirəcək və turizm sektorunda iştirak edən kiçik, orta və iri sahibkarları gücləndirəcək” – nazir müavini qeyd edib.

İqtisadiyyat və Davamlı İnkişaf Nazirliyinin məlumatına əsasən, Mərkəzi Asiyanın ən böyük aviaşirkəti olan “Air Astana”nın yay mövsümündə həftədə doqquz reys tezliyi ilə Almatıdan Tbilisi istiqamətində birbaşa uçuşlar həyata keçirməsi də vacib haldır. Çərşənbə və şənbə günləri aviaşirkət Gürcüstan paytaxtı istiqamətində gündə iki dəfə uçuş həyata keçirəcək.

Nazirliyin məlumatına əsasən, Almatı-Batumi istiqaməti üzrə mövsümi uçuşlar iyun ayından etibarən həftədə üç reys tezliyi ilə bərpa olunacaq, iyul-avqust ayları üçün isə aviaşirkət tezliklərin həftədə 5-ə qədər artırılmasını nəzərdən keçirir. Həmçinin, “Air Astana” iyun ayından etibarən Tbilisi ilə Qazaxıstanın paytaxtı Astana arasında həftədə üç reys tezliyi ilə uçuşları bərpa edəcək.

Kutaisi Beynəlxalq Hava Limanına gəlincə, Kutaisidən Qazaxıstanın beş şəhərinə uçuşlar “Air Astana”nın törəmə şirkəti olan “FlyArystan” aşağı büdcəli aviaşirkəti tərəfindən həyata keçirilir. Yay mövsümündə isə Qazaxıstan istiqamətində və əksinə uçuşların sayı həftədə 10 reys tezliyindən 17-yə qədər yüksələcək. “FlyArystan” Kutaisi Beynəlxalq Hava Limanına Astana, Almatı, Atırau, Aktau və Çimkentdən birbaşa müntəzəm reyslər həyata keçirir.

Atırau-Tbilisi istiqaməti üzrə biletləri aviaşirkətin www.airastana.com veb saytından artıq almaq olar.