Mariam Kvrivişvili Çin Xalq Respublikasının vitse-baş naziri Tinq Siuesianq ilə görüşüb
Çinə işgüzar səfəri çərçivəsində Gürcüstanın vitse-baş naziri, iqtisadiyyat və dayanıqlı inkişaf naziri Mariam Kvrivişvili Çin Xalq Respublikasının vitse-baş naziri, Çin Kommunist Partiyasının Mərkəzi Komitəsinin Siyasi Bürosunun Daimi Komitəsinin üzvü Tinq Siuesianq ilə görüşüb.
İqtisadiyyat Nazirliyinin mətbuat xidmətinin məlumatına əsasən, görüşdə iki ölkə arasında mövcud hərtərəfli strateji tərəfdaşlığın əhəmiyyəti vurğulanıb.
“Tərəflər Gürcüstan və Çin arasında ticarət-iqtisadi əlaqələrin dərinləşdirilməsi perspektivlərini müzakirə ediblər. Ölkələr arasında mövcud sıx tərəfdaşlığa, nəqliyyat, investisiya və digər prioritet sahələrdə əməkdaşlığın inkişafı imkanlarına diqqət yönəldilib.
Ticarət sektorunda əməkdaşlığa xüsusi vurğu edilib. Qeyd olunub ki, 2025-ci ildə Gürcüstan ilə Çin arasında ticarət dövriyyəsi 21 faiz artıb, bu meyil 2026-cı ildə də davam edib və yanvar-sentyabr aylarında bu göstəricinin artımı 41 faiz təşkil edib” – İqtisadiyyat Nazirliyinin yaydığı məlumatda qeyd olunub.
Onların məlumatına əsasən, görüşdə Gürcüstanın İqtisadiyyat və Dayanıqlı İnkişaf Nazirliyinin Çinin Ticarət, Nəqliyyat nazirlikləri və Milli İnkişaf və İslahatlar Komissiyası ilə əməkdaşlığı müsbət qiymətləndirilib.
“Bu kontekstdə ikitərəfli ticarətin dəstəklənməsi məqsədilə birinci iclası artıq keçirilən birgə işçi qrupunun yaradılmasının əhəmiyyəti qeyd olunub. Tərəflər ticarət-iqtisadi əlaqələrin dərinləşdirilməsində, Çin bazarında gürcü məhsullarının ixracına dəstək verilməsində və ixrac potensialının daha yaxşı mənimsənilməsində işçi qrupunun rolunu vurğulayıblar.
Orta Dəhlizin inkişaf perspektivlərinə və Gürcüstanın bu istiqamətdəki roluna toxunulub. Gürcü tərəfi mühüm nəqliyyat-infrastruktur layihələrinə, o cümlədən Anaklia dərin dəniz limanı və dəmir yolunun modernləşdirilməsi layihəsinə diqqət çəkib.
Mülki aviasiya sahəsində əməkdaşlığa xüsusi vurğu edilib. Tərəflər birbaşa uçuşların turist axınının artmasına və xalqlararası əlaqələrin güclənməsinə müsbət təsirini qeyd ediblər” – İqtisadiyyat Nazirliyinin yaydığı məlumatda deyilir.
Onların məlumatına əsasən, söhbət zamanı Şanxayda keçirilən Çin Beynəlxalq İdxal Sərgisində Gürcüstanın nümayəndəli iştirakı müsbət qiymətləndirilib.
Görüşdə Gürcüstanın iqtisadiyyat və dayanıqlı inkişaf nazirinin müavinləri Tamar İoseliani və İrakli Nadareişvili, Gürcüstan Ticarət-Sənaye Palatasının prezidenti Qiorqi Pertaia, eləcə də Çin Xalq Respublikasının ticarət naziri Vanq Ventao və Şanxay şəhərinin meri Cu Cunqminq iştirak edirdilər.