Amerika Birləşmiş Ştatları ilə münasibətlərimizin və strateji əməkdaşlığımızın bərpa olunacağına və yenidən başlayacağına nikbinliklə baxırıq – Gürcüstanın iqtisadiyyat və dayanıqlı inkişaf naziri Mariam Kvrivişvili ABŞ Dövlət Departamentinin Avropa və Avrasiya İşləri Bürosunun nümayəndəsi Piter Andreoli ilə ölkələr arasında ticarət və iqtisadi münasibətlərin dərinləşdirilməsi məsələsinin müzakirə edildiyi görüşdən sonra bildirib.

“ABŞ Dövlət Departamentinin Avropa və Avrasiya İşləri Bürosunun nümayəndəsi Piter Andreolinin Gürcüstana səfəri çərçivəsində onu Anaklia dərin su limanının inkişaf planları ilə tanış etmək imkanı əldə etdik. O, həmçinin Anaklia dərin su limanının ərazisində olub və yerindəcə cari irəliləyiş və dövlətin bu layihənin inkişafı ilə bağlı planları ilə tanış olub” – iqtisadiyyat naziri qeyd edib.

Mariam Kvrivişvili ABŞ nümayəndə heyətini Gürcüstanın investisiya imkanları ilə tanış edib. Görüş zamanı Gürcüstanın Orta Dəhliz marşrutundakı mühüm roluna, eləcə də ölkəmizin iqtisadiyyatının bir sıra sahələrinə, o cümlədən enerji, nəqliyyat, logistika və digər sahələrə toxunulub.

İqtisadiyyat nazirinin qiymətləndirməsinə əsasən, ABŞ Dövlət Departamentinin Avropa və Avrasiya İşləri Bürosunun nümayəndəsi ilə görüş olduqca məhsuldar keçib, gürcü tərəfi ölkələr arasında strateji tərəfdaşlığın bərpası haqda böyük istəyini və müsbət gözləntilərini bir daha açıq şəkildə ifadə edib, bu da ticarət və iqtisadi əlaqələrin güclənməsinə müsbət təsir göstərəcək.

“Həmçinin, Gürcüstanda yuxarıda qeyd olunan sektorlarda, xüsusən də Gürcüstan Dəmir Yolunun modernləşdirilməsi, yeni beynəlxalq hava limanı və Qara dəniz sualtı kabel layihələri kimi böyük layihələrdə mövcud investisiya imkanlarından danışdıq. Əlbəttə, Amerika Birləşmiş Ştatları ilə münasibətlərimizin və strateji əməkdaşlığımızın bərpa olunacağına və yenidən başlayacağına nikbinliklə baxırıq” – Mariam Kvrivişvili bildirib.