Əminəm ki, ən böyük investisiya şirkəti “DAMAC Properties” ilə görüşdən sonra ölkəmizin iqtisadiyyatının güclənməsinə əlavə töhfə verəcək daha bir uğurla başa çatmış danışıqlarımız olacaq – bu haqda iqtisadiyyat və dayanıqlı inkişaf naziri Mariam Kvrivişvili Gürcüstanın Baş naziri İrakli Kobaxidze ilə “DAMAC Properties”in təsisçisi Husein Sacvani arasında keçirilən görüşdən sonra deyib.

Görüşdə Mariam Kvrivişvili ilə birlikdə, ədliyyə naziri Paata Salia və Hökumət Administrasiyasının rəhbəri Levan Jorjoliani iştirak edirdilər.

“Gürcüstanın Baş naziri ilə birlikdə Birləşmiş Ərəb Əmirliklərinin ən böyük korporasiyasının təsisçisi ilə mühüm görüş baş tutdu və Gürcüstanın cəlbedici investisiya mühitini ətraflı şəkildə müzakirə etmək imkanı əldə etdik. Gürcüstana investisiya qoyuluşunun mümkün olduğu bir sıra sektorları müzakirə etdik və əminəm ki, bu görüşdən sonra ölkəmizin iqtisadiyyatının güclənməsinə əlavə töhfə verəcək daha bir uğurla başa çatmış danışıqlarımız olacaq” – Mariam Kvrivişvili qeyd edib.

Nazirin məlumatına əsasən, “DAMAC Properties” həm inkişaf, həm də qonaqpərvərlik sektorunda yerli və beynəlxalq bazarda ən böyük oyunçudur.

15 ölkədə fəaliyyət göstərən və dörd mindən çox əməkdaşı olan “DAMAC” qrupu Yaxın Şərqdə aparıcı otel və daşınmaz əmlak developeridir və illik gəliri dörd milyard ABŞ dollarını aşır.