İdarə olunan dezinformasiya kampaniyaları və bəzi aktorların Gürcüstanın demokratik institutlarına və proseslərinə qarşı yönəlmiş koordinasiya olunmuş fəaliyyətləri bizi dərin narahat edir, – bunu Gürcüstanın xarici işlər naziri Maka Boçorişvili ATƏT-in Nazirlər Şurasının 32-ci iclasında çıxışı zamanı bildirib.

Bochorishvilinin sözlərinə görə, bu cəhdlər cəmiyyətin inamına zərbə vurmağı, polarizasiyanı dərinləşdirməyi və dövlətin əsaslarını zəiflətməyi hədəfləyir.

“Rusiyanın Ukraynaya qarşı təcavüzü Gürcüstanın üzləşdiyi təhlükələri və həssaslıqları daha da gücləndirdi. Xüsusilə o fonda ki, ölkəmi heç bir kollektiv təhlükəsizlik çətiri qorumur. Bu kontekstdə təhlükəsizliyimizin təmin olunması üçün sabitlik kritik əhəmiyyət daşıyır. İdarə olunan dezinformasiya kampaniyaları və bəzi aktorların Gürcüstanın demokratik institutlarına və proseslərinə qarşı yönəlmiş koordinasiya olunmuş fəaliyyətləri bizi dərin narahat edir. Bu destruktiv cəhdlər cəmiyyətin inamına zərər vurmağı, polarizasiyanı dərinləşdirməyi və dövlətin əsaslarını zəiflətməyi hədəfləyir. Təəssüf ki, getdikcə daha çox görürük ki, oxşar məqsədlər üçün beynəlxalq təşkilatlardan və institutlardan sui-istifadə cəhdləri edilir ki, bu da onların reputasiyasına və cəmiyyətin onlara olan inamına zərər vurur. Daha da pisi, ölkə daxilində radikallaşmanın təşviqi regional təhlükəsizliyə töhfə verə bilməz və verməyəcək.

Hibrid təhlükələrə, dezinformasiyaya və suverenliyimizin sarsıdılmasına yönəlmiş hər hansı cəhdə cavab olaraq Gürcüstan öz demokratik institutlarının müdafiəsi və dayanıqlılığın gücləndirilməsi yolu ilə sabitliyin möhkəmləndirilməsini davam etdirir. Biz inanırıq ki, demokratik idarəetmənin qorunması və dayanıqlılıq təkcə Gürcüstanda deyil, bütün Avropada təhlükəsizlik və rifahın vacib şərtidir.

İcazə verin, fürsətdən istifadə edərək tarixi sülh sazişini – “Azərbaycan Respublikası və Ermənistan Respublikası arasında sülh və dövlətlərarası münasibətlərin qurulması haqqında” Vaşinqtonda, Amerika Birləşmiş Ştatlarının prezidentinin vasitəçiliyi ilə əldə olunmuş razılaşmanı alqışlayım. Bu tarixi saziş Cənubi Qafqazda davamlı sülhün təmin olunması üçün mühüm təməl daşıdır və regionda uzunmüddətli sabitlik və inkişaf üçün yeni imkanlar yaradır. Gürcüstan sülhün və regional əməkdaşlığın təşviqini qətiyyətlə davam etdirəcək və beynəlxalq hüququn təmin edilməsi, suverenliyin qorunması, Cənubi Qafqazda və ATƏT regionunda uzunmüddətli sülhün təmin olunması üçün bütün tərəfdaşlarla işləməyə hazırdır,” – deyə Maka Boçorişvili bildirib.