Gürcüstan və Azərbaycan arasında mövcud strateji tərəfdaşlıq həqiqətən nümunəvidir, əminəm ki, ölkələrimizin və xalqlarımızın rifahı naminə və bir-birinin maraqlarını nəzərə almaqla, əlaqələrimiz daha da sürətli templə inkişaf edəcək – bu haqda xarici işlər nazirliyinin rəhbəri Maka Bocorişvili Bakıya rəsmi səfər çərçivəsində azərbaycanlı həmkarı Ceyhun Bayramovla görüşdən sonra keçirilən mətbuat konfransında bildirib.

Nazirin məlumatına əsasən, azərbaycanlı həmkarı ilə çox mühüm görüş keçirilib, söhbət zamanı həm Gürcüstan və Azərbaycan arasında ikitərəfli gündəliyə, həm də regionda və dünyada gedən proseslərə toxunulub.

“Birgə səylərimizlə ölkələrimiz arasında əməkdaşlıq daha da genişlənir və yeni müsbət ölçülər qazanır, bu da təkcə ölkələrimizin deyil, həm də regionun rifahı üçün vacibdir” – Maka Bocorişvili bildirib.

Regionda gedən proseslər haqda danışarkən sülhün və sabitliyin zəruriliyi vurğulanıb.

“Gürcüstan hər zaman regionumuzda sülh və sabitliyə sadiq olub və olacaq və ölkələr arasında mehriban qonşuluq münasibətlərinin inkişafına və regionumuzda davamlı sülhün təmin edilməsinə kömək etməyə hər zaman hazır olacaq” – xarici işlər naziri qeyd edib.

Xarici işlər nazirinin bəyanatına əsasən, regional əməkdaşlıq kontekstində uğurlu regional əməkdaşlığın yaxşı nümunəsi olan Gürcüstan, Azərbaycan və Türkiyə arasında üçtərəfli format vurğulanıb.

“Biz birgə regional nəqliyyat və enerji layihələrinin əhəmiyyəti və gələcək perspektivlərinə diqqət yetirdik. “Orta Dəhliz”in rolu və əhəmiyyəti vurğulanıb. Biz vahid səylə regionumuzun rolunu və funksiyasını keyfiyyətcə artıran bir sıra strateji əhəmiyyətli layihələrin təşəbbüskarı olmuşuq və uğurla həyata keçiririk” – Xarici İşlər Nazirliyinin rəhbəri qeyd edib.

Qeyd olunub ki, Gürcüstan və Azərbaycan bir-birinin suverenliyini və ərazi bütövlüyünü qətiyyətlə dəstəkləyir. Bundan əlavə, Maka Bocorişvili Gürcüstan ərazilərinin işğalı ilə bağlı çağırışlardan danışıb.

İki ölkə arasında ticarət-iqtisadi əlaqələr haqda danışarkən qeyd olunub ki, Azərbaycan son illərdə Gürcüstanın ilk beş ticarət tərəfdaşı arasındadır. Ticarət dövriyyəsinin daha da artacağına ümidvar olunduğu deyilib.

Tərəflər yanvarın 17-də Bakıda Gürcüstan və Azərbaycan Respublikası arasında İqtisadi Əməkdaşlıq üzrə Birgə Hökumətlərarası Komissiyanın 10-cu iclasının Gürcüstan və Azərbaycanın baş nazirlərinin həmsədrliyi ilə keçirilməsini təqdir ediblər.

Həmçinin, mədəniyyət və təhsil sahəsində fəal əməkdaşlığa diqqət yetirilib.

Maka Bocorişvili azərbaycanlı həmkarını onun üçün əlverişli vaxtda Gürcüstana dəvət edib.

Maka Bocorişvili xarici işlər naziri kimi Azərbaycan Respublikasına ilk rəsmi səfərini edir.