Gürcüstan-Azərbaycan münasibətləri artıq çoxdan ikitərəfli münasibətlər çərçivəsindən çıxıb. Bu münasibətlər çox böyük regional və qlobal əhəmiyyət daşıyır. Bu baxımdan iki ölkə arasında mövcud olan siyasi dialoq daha da vaxtında və aktuallaşır, – bu barədə Gürcüstanın xarici işlər naziri Maka Boçorişvili Azərbaycanın xarici işlər naziri Ceyhun Bayramovla birgə keçirdiyi brifinqdə bildirib.

Boçorişvilinin sözlərinə görə, Azərbaycanın xarici işlər nazirinin səfəri iki ölkə arasında mövcud olan intensiv siyasi dialoqun ən yaxşı davamıdır.

“Mən nazir Ceyhun Bayramovu salamlayıram. Sizin bu gün Gürcüstanda qonağımız olmanız mənim üçün böyük şərəfdir və sizə bu imkana görə səmimi təşəkkürümü bildirirəm ki, dəvəti qəbul etdiniz və bu gün Gürcüstana səfər etmisiniz. Bu il Gürcüstanla Azərbaycan arasındakı münasibətlər siyasi dialoqumuzda aydın şəkildə əks olunur. Bir çox yüksək səviyyəli səfərlər həyata keçirildi, gürcü və azərbaycanlı tərəflər arasında bir çox görüşlər baş tutdu. Bu günkü səfər isə bu intensiv siyasi dialoqun ən yaxşı davamıdır, hansı ki, iki ölkə arasında uğurla həyata keçirilir. Ölkələrimizin tarixi və münasibətləri qonşuluğun, dostluğun və tərəfdaşlığın ən yaxşı nümunələri ilə doludur. Məhz bu təməl üzərində bu gün biz əlaqələrimizin dərinləşdirilməsindən, onların gücləndirilməsi imkanlarından danışırıq. Münasibətlərimiz artıq çoxdan ikitərəfli münasibətlər çərçivəsindən çıxıb və onlar çox böyük regional və qlobal əhəmiyyət daşıyır. Bu baxımdan, iki ölkə arasında mövcud olan siyasi dialoq daha da maraqlı, zəruri və vaxtındadır,” – deyə Boçorişvili bildirib.

Maka Boçorişvilinin sözlərinə görə, Gürcüstan və Azərbaycan bir-birinin ərazi bütövlüyünü qətiyyətlə dəstəkləyirlər.

“Bu gün bizdə bir çox məsələləri müzakirə etmək üçün çox yaxşı imkan oldu, bu məsələlər iki ölkə arasında müxtəlif sahələrdə və istiqamətlərdə münasibətləri, siyasi dialoqumuzun gücləndirilməsini əhatə edirdi. Həmçinin, regionda və dünyada baş verən prosesləri, bu proseslərin ölkələrimizə və münasibətlərimizə olan təsirlərini müzakirə etdik. Təbii ki, ikitərəfli münasibətlər kontekstində Gürcüstan və Azərbaycanın bir-birinin ərazi bütövlüyünü qətiyyətlə dəstəkləməsi çox vacibdir. Bu qarşılıqlı hörmətə əsaslanan münasibətlərdir. Biz təhlükəsizlik çağırışları haqqında danışdıq. Gürcüstan üçün əsas təhlükəsizlik çağırışı iki regionun işğalı olaraq qalır və bu, yalnız lokal deyil, bütün regionun təhlükəsizliyinə təsir göstərən məsələdir. İkitərəfli münasibətlərə dair mühüm məsələləri, iqtisadi sahədə əməkdaşlığı müzakirə etdik. Baş nazirin Azərbaycana səfəri zamanı açıq şəkildə qeyd olundu ki, bu istiqamətdə potensial bu gün istifadə etdiyimizdən daha böyükdür. Rəqəmlər kifayət qədər təsir edici olsa da, biz bu istiqamətdə aktiv işləməyə davam etməkdə israrlıyıq ki, iki ölkə arasındakı iqtisadi əlaqələr daha da artsın. Bu potensial doğrudan da mövcuddur. Eyni zamanda daha geniş, regional kəsimdə əməkdaşlıqdan danışdıq. Mərkəzi Asiya ölkələrinə bir çox səfərləri xatırladıq. Məhz bu kontekstdə Gürcüstanla Azərbaycan arasında əməkdaşlığın, dostluğun və tərəfdaşlığın əhəmiyyəti daha da böyükdür və daha yaxşı istifadə olunmalıdır ki, bu qədər tez-tez müzakirə olunan ‘Orta Dəhliz’ daha səmərəli şəkildə inkişaf etdirilsin,” – deyə Boçorişvili bildirib.