Avropa İnsan Hüquqları Məhkəməsinin işğal olunmuş bölgələrdə insan hüquqlarının pozulmasına görə Rusiyanın məsuliyyətini təsdiqləyən qərarlarına laqeyd yanaşılmamalıdır. Bu pozuntalara cavab vermək üçün beynəlxalq mexanizmlərdən istifadəni dayandırmamalıyıq – Gürcüstan Xarici İşlər Nazirliyinin məlumatına əsasən, bu barədə xarici işlər naziri Maka Bocorişvili Avropa Şurasının Nazirlər Komitəsində çıxışı zamanı bildirib.

Bocorişvilinin sözlərinə əsasən, Gürcüstan münaqişənin sülh yolu ilə həll olunması yollarını axtarmağa davam edir və bu prosesdə beynəlxalq ictimaiyyətin dəstəyinə böyük önəm verilir.

“Cənab Baş Katib, əziz həmkarlar, əvvəlcə, Lüksemburqun Nazirlər Komitəsinin sədrliyinə və əziz Ksavyeyə göstərdikləri əla qonaqpərvərliyə görə səmimi təşəkkürümü bildirmək istəyirəm.

Əziz həmkarlar, bu çalxantılı dövrdə təhlükəsizliyin və sabitliyin təmin edilməsi regionumuz üçün əsas çağırışdır. Beynəlxalq normaların və prinsiplərin pozulması ciddi təhlükəsizlik problemləri yaradır və müvafiq olaraq, bizim əsas məqsədimiz bu prinsiplərin qorunması və sülh uğrunda mübarizə olmalıdır.

Gürcüstan Rusiyanın təcavüzünü və onun dağıdıcı nəticələrini yaşamış ölkədir. Biz yaxşı bilirik ki, müharibə nələrə yol açır və sülh və sabitlik ölkəmizin və bütövlükdə regionun inkişafı üçün nə qədər vacib əhəmiyyət kəsb edir.

Gürcüstanın Abxaziya və Sxinvali bölgələrinin işğal altında olduğu şəraitdə biz Rusiya-Gürcüstan münaqişəsinin sülh yolu ilə həlli yollarını axtarmağa davam edirik və bu prosesdə beynəlxalq ictimaiyyətin dəstəyinə böyük önəm veririk.

Avropa İnsan Hüquqları Məhkəməsinin işğal olunmuş bölgələrdə insan hüquqlarının pozulmasına görə Rusiyanın məsuliyyətini təsdiqləyən qərarlarına laqeyd yanaşılmamalıdır. Bu pozuntalara cavab vermək üçün beynəlxalq mexanizmlərdən istifadəni dayandırmamalıyıq” – Maka Bocorişvili bildirib.

Bununla yanaşı, Bocorişvili qeyd edib ki, demokratiyadan danışarkən əsas prioritet demokratik institutların qorunması olmalıdır.

“Əziz həmkarlar, ümumi dəyərlərimiz bu təşkilatda bizi birləşdirən təməldir. Baş katibin “Avropa üçün Yeni Demokratik Pakt” təşəbbüsünü alqışlayırıq. Bu təşəbbüs, Avropa Şurasına üzv olan bütün dövlətlər üçün vacib çərçivəyə çevrilə bilər.

Demokratiyadan danışarkən əsas prioritet demokratik institutların qorunması olmalıdır. Xalqın seçiminə, demokratik yolla seçilmiş hökumətlərə hörmət göstərməyimiz və siyasi prosesi demokratik institutlardan kənara çıxarmağı təşviq etməkdən çəkinməyimiz vacibdir.

Ciddi təhlükəsizlik çağırışlarına baxmayaraq, son on ildə, xüsusilə Avropaya inteqrasiya prosesində həyata keçirilən islahatlar nəticəsində Gürcüstan müxtəlif sahələrdə regionda lider mövqeyini möhkəmləndirməyə nail olub: hüququn aliliyini gücləndirmişik, insan hüquqlarının müdafiəsinin yüksək standartlarını təsis etmişik və korrupsiyaya qarşı mübarizə üçün effektiv mexanizmlər yaratmışıq.

Bütün bunlar beynəlxalq reytinqlərdə öz əksini tapır və Avropa İnsan Hüquqları Məhkəməsinin qərarları ilə təsdiqlənir.

Bu nəzərəçarpacaq inkişafa baxmayaraq, Gürcüstana qarşı ədalətsiz yanaşma və tərəfdaşlarımız tərəfindən qarşılaşdığımız ikili standartlar narahatlıq doğurur və etimada zərər vurur. Beynəlxalq institutlar qarşılıqlı hörmət əsasında konstruktiv əməkdaşlığı təşviq etməli və onların siyasi alət kimi istifadəsinin qarşısını almalıdırlar.

Sonda isə, Maltanın gələcək sədrliyinə dəstəyimi ifadə etmək və onlara bu mühüm missiyada uğurlar arzulamaq istəyirəm” – Maka Bocorişvili bildirib.