Demək olar ki, Almaniyanın Xarici İşlər Nazirliyi alman dəqiqliyi haqqında mifi darmadağın edib. Əslində, artıq ikinci ildir ki, dəyişikliklər Almaniya Xarici İşlər Nazirliyinin vebsaytında əks olunmur. Bu barədə Gürcüstanın xarici işlər naziri Maka Boçorişvili “Gecə Kurieri” verilişində qonaq olarkən bildirib.

Boçorişviliyə Almaniya Xarici İşlər Nazirliyinin vebsaytında Gürcüstanla bağlı yerləşdirilən məlumat barədə sual verilib. Xüsusilə, Almaniya tərəfinin niyə məlumatları yeniləmədiyi və həmin məlumatlarda Salome Zurabişvilinin hələ də prezident kimi göstərildiyi soruşulub.

Nazirin sözlərinə görə, Gürcüstan tərəfinin dəfələrlə müraciət etməsinə baxmayaraq, Almaniya Xarici İşlər Nazirliyi ölkə ilə bağlı məlumatları yeniləmir.

“Bizim Almaniya tərəfi ilə əlaqələrimiz var. Mən tez-tez alman həmkarlarımla, o cümlədən Xarici İşlər Nazirliyində danışıram. Bu əlaqələr və kommunikasiya mövcuddur və, əlbəttə ki, məyusedicidir ki, Almaniya Xarici İşlər Nazirliyi bu kiçik addımı belə atmır ki, öz vebsaytında sadəcə düzgün məlumatı əks etdirsin. Halbuki Gürcüstan tərəfi bunu tələb edir və nəyinsə yanlış olduğunu bildirir. Təbii ki, iki ildir texniki nasazlığın aradan qaldırılmadığına inanacaq qədər sadəlövh deyilik. Biz bunu texniki problem kimi qəbul edə bilmərik. İki soyadın düzəldilməsi o qədər də çətin deyil. Burada məsələ Almaniya tərəfinin öz vebsaytında düzgün məlumat yerləşdirmək üçün siyasi iradə nümayiş etdirməsidir”, – deyə xarici işlər naziri bildirib.