Yunanıstan Respublikasında keçirilən “Delfi İqtisadi Forumu” çərçivəsində Gürcüstanın baş nazir müavini, xarici işlər naziri Maka Boçorişvili “Genişlənmənin təmin etdiyi müdafiə: təhlükəsizlik üzvlüyün yeni dayağı kimi” adlı işçi sessiyada iştirak edib.

Nazir çıxışı zamanı Avropa təhlükəsizliyinin gücləndirilməsi məsələsinə toxunaraq vurğulayıb ki, Avropa təhlükəsizliyi müzakirə olunarkən Avropa İttifaqı ilə onun hüdudlarından kənarda olan ölkələr bir-birindən ayrılmamalıdır, çünki Aİ-nin təhlükəsizliyi onun qonşuluğunda sülh və sabitlik olmadan təmin edilə bilməz.

“Təhlükəsizlikdən danışarkən ilk növbədə qarşımızda duran çağırışları nəzərdən keçirməliyik. Avropa təhlükəsizliyi haqqında danışarkən biz Aİ və qeyri-üzv ölkələri bir-birindən ayırmamalıyıq, çünki ortaq ehtiyaclarımız və təhlükəsizlik maraqlarımız var. 2008-ci ildə və ondan əvvəl Gürcüstanda baş verən hadisələrə, eləcə də Ukraynada davam edən müharibənin Avropa təhlükəsizlik arxitekturasına təsirinə nəzər salsaq, aydın olur ki, Aİ-nin təhlükəsizliyi onun qonşuluğunda sülh və sabitlik olmadan mümkün deyil. Eyni zamanda, Gürcüstanın təhlükəsizliyi Aİ-nin təhlükəsizliyindən ayrı şəkildə nəzərdən keçirilə bilməz. Məhz buna görə də təhlükəsizlik məsələsində birlikdə düşünməli və hərəkət etməliyik”, – deyə Maka Boçorişvili bildirib.

Xarici işlər naziri vurğulayıb ki, Avropa təhlükəsizliyi üçün Qara dəniz regionu və Cənubi Qafqaz kritik əhəmiyyət daşıyır. Bununla yanaşı, müasir təhlükəsizlik artıq yalnız hərbi komponentlə məhdudlaşmır və daha geniş, çoxtərəfli yanaşma tələb edir.

“Bu gün təhlükəsizlik yalnız hərbi güc və imkanlar demək deyil. Təhlükəsizliyin anlayışı iqtisadi dayanıqlılığı, əlaqəliliyi və davamlı inkişafı da əhatə edir. Xəritəyə baxsaq, Avropa üçün olduqca mühüm olan bir xəttin Qara dəniz regionu və Cənubi Qafqazdan keçdiyini görərik. Bu, Avropa təhlükəsizliyi üçün son dərəcə vacib regiondur və biz özümüzü bu təhlükəsizlik arxitekturasının bir hissəsi hesab edirik. Bu amil Avropa təhlükəsizliyi qurularkən mütləq nəzərə alınmalıdır”, – deyə nazir qeyd edib.

Maka Boçorişvili çıxışında Gürcüstanın Avropa inteqrasiyası prosesinə də xüsusi yer ayırıb.

“Gürcüstanın Avropa inteqrasiyası yolu möhkəmdir, bu, bizim kimliyimizin bir hissəsi və tarixi seçimimizdir. Bu, dəyərlərə əsaslanan seçimdir”, – deyə o bildirib.

Nazir həmçinin vurğulayıb ki, genişlənmə prosesi geniş geosiyasi kontekstdə nəzərdən keçirilməlidir.

“Genişlənmə geosiyasi proses və zərurətdir. O, dar bürokratik yanaşmaların qurbanına çevrilməməlidir, əks halda onun əsas ideyasına zərər dəyər. Genişlənmə özlüyündə məqsəd deyil – bu, daha mühüm məqsədə, yəni ümumi təhlükəsizlik və sülhün təmininə nail olmaq üçün istifadə olunan vasitədir”, – deyə nazir bildirib.

Maka Boçorişvili həmçinin Gürcüstanın qarşısında duran təhlükəsizlik çağırışlarına, o cümlədən Rusiyanın Gürcüstan ərazilərinin işğalına və mürəkkəb geosiyasi mühitə diqqət çəkib.

“Çətin geosiyasi şəraitə baxmayaraq, biz ölkədə sülh və sabitliyi qoruyub saxlaya, demokratik institutları çoxsaylı təzyiqlərə baxmayaraq müdafiə edə bildik. Eyni zamanda davamlı inkişafı təmin etdik ki, bu da sabit iqtisadi artım deməkdir”, – deyə xarici işlər naziri vurğulayıb.

Sonda Maka Boçorişvili qeyd edib ki, Gürcüstan Avropa İttifaqına üzvlük üçün möhkəm əsas yaratmaq məqsədilə inkişafı və islahatları davam etdirəcək.

“Biz ölkə üçün vacib olan inkişaf və islahatları davam etdiririk ki, nəticədə Avropa İttifaqına üzvlük üçün möhkəm zəmin yaradılsın. Bu, Gürcüstanın və gürcü xalqının seçimidir”, – deyə nazir bildirib.