İsrail tərəfindən endirilən zərbələr nəticəsində Livanda yeddi nəfər həlak olub, ən azı 23 nəfər yaralanıb. Bu haqda “BBC” Livanın Səhiyyə Nazirliyinə istinadən yazır.

Xüsusilə, bəyanatda Beyrutun 45 kilometr şərqində yerləşən Temnine et Tahta kəndində yeddi nəfərin həlak olduğu, 18 nəfərin yaralandığı, yaxınlıqdakı Ali al-Nahri kəndinə edilən hücum nəticəsində isə daha beş nəfərin yaralandığı qeyd olunub.

Son bir neçə saat ərzində İsrailin Müdafiə Qüvvələri Livanın cənubunda yerləşən altı kəndin sakinlərinin təxliyə edilməsinə çağırıb.

Bununla yanaşı, “Associated Press”in yazdığı kimi, ölkədə hazırda 780 000 insan müharibə səbəbindən evlərini tərk etmək məcburiyyətində qalıb. Yayılmış məlumata əsasən, hazırda Livan miqyasında sığınacaqlarda 120 000 məcburi köçkün qalmaqdadır.