2025-ci il Uşaq Avroviziya Mahnı Müsabiqəsi üçün Gürcüstana 20-yə yaxın ölkənin nümayəndəsi gələcək. Tədbir isə Yeni İdman Sarayının kiçik zalında baş tutacaq – bu barədə Gürcüstan hökumət administrasiyasının rəhbəri Levan Jorjoliani məlumat verib.

Levan Jorjolianinin sözlərinə görə, müsabiqənin iştirakçıları Gürcüstana müsabiqədən on gün əvvəl gələcəklər və bu müddət ərzində Gürcüstan mədəniyyəti ilə daha yaxından tanış olmaq imkanı əldə edəcəklər.

“Son 16-17 il ərzində, yəni Gürcüstanın Uşaq Avroviziya Mahnı Müsabiqəsində ilk dəfə iştirak etməsindən bəri, Gürcüstan bu yarışmada Avropa ölkələri arasında ən uğurlu ölkə olub. Ən çox qələbə və ciddi nəticələr əldə etmişik. Bildiyiniz kimi, 2024-cü ildə Andria Futkaradze rekord xal toplayaraq qalib gəldi. Bu, indiyədək görünməmiş bir nəticə idi. Nəticə etibarilə Gürcüstan 2025-ci ildə keçiriləcək müsabiqəyə ev sahibliyi etmək hüququ qazandı. Müsabiqə 13 dekabrda keçiriləcək.

Gürcüstana azı 12, maksimum 20 ölkənin nümayəndəsi gələcək. Tədbir Yeni İdman Sarayının kiçik zalında baş tutacaq. Biz birlikdə möhtəşəm bir şou təşkil edəcəyik. Həmçinin Gürcüstana təxminən 100 jurnalist gələcək. İştirakçılar öz komandaları ilə birlikdə Gürcüstana müsabiqədən on gün əvvəl gələcəklər. Onlar ölkəmizi daha yaxından tanıyacaq, mədəniyyətimizi yaşayacaqlar. Gürcü tamaşaçıları isə həqiqətən unudulmaz bir şou gözləyir,” – deyə Levan Jorjoliani bildirib.

Gürcüstan 2025-ci il Uşaq Avroviziya Mahnı Müsabiqəsinə 13 dekabrda ev sahibliyi edəcək.