Gürcüstan, Macarıstan, Rumıniya, Bolqarıstan və Azərbaycan hökumətlərinin yüksək vəzifəli nümayəndələrinin iştirakı ilə Budapeşt şəhərində Yaşıl Orta Dəhlizin nazirlər görüşünün plenar iclası keçirilib və iclasda yaşıl enerjinin inkişafı və ötürülməsi sahəsində strateji tərəfdaşlığın əsas istiqamətlərini müzakirə ediblər.

Nazirlər görüşündə Gürcüstanın birinci vitse-baş naziri, iqtisadiyyat və davamlı inkişaf naziri Levan Davitaşvili, Macarıstanın xarici işlər və ticarət naziri Piter Siiarto, Azərbaycanın energetika naziri Pərviz Şahbazov, Rumıniyanın energetika naziri İoan Burduja və Bolqarıstanın energetika naziri Jeço Stankov çıxış ediblər.

Həmçinin, Gürcüstan tərəfdən iclasda “Gürcüstanın Dövlət Elektrik Sistemi” SC-nin baş direktoru Qiorqi Qiqineişvili və Gürcüstanın Macarıstandakı səfiri Tamar Liluaşvili iştirak edirdilər.

“Biz birlikdə regionda enerjinin gələcəyini formalaşdırırıq və birlikdə ümumi məqsədə – təmiz, əlaqəli və təhlükəsiz enerji gələcəyinə nail olacağıq. Bunun üçün planlarımızı real əməllərə çevirmək üçün daha çox səy və əməkdaşlığa ehtiyacımız var. Mən tərəfdaş ölkələrə və maraqlı tərəflərə göstərdikləri fəal dəstəyə görə səmimi təşəkkürümü bildirirəm” – Levan Davitaşvili nazirlər görüşündə çıxışında bildirib.

Levan Davitaşvilinin qeyd etdiyi kimi, nazirlər görüşünün iştirakçıları Bolqarıstanın da Qara dəniz sualtı kabel layihəsinə qoşulacağı barədə razılaşıblar. O bildirib ki, komandanın qarşısında mühüm vəzifələr dayanır, o cümlədən onlardan biri İtaliyanın konsaltinq şirkəti tərəfindən həyata keçirilən texniki-iqtisadi əsaslandırmanın tamamlanmasıdır və proses sürətlə irəliləyir. Nazir ümidvar olduğunu bildirib ki, cari ilin ikinci rübünün sonuna kimi tam texniki-iqtisadi əsaslandırma əlçatan olacaq və layihə praktiki icra mərhələsinə keçəcək.

“Fikrimcə, biz bütün Avropanın enerji təhlükəsizliyinə zəmanət verəcək flaqman layihəsinin həyata keçirilməsinə tam mandat verə bilərik və bu, təkcə Cənubi Qafqaz və ya Xəzər regionu ölkələrinin maraqlarına uyğun deyil, həm də fikrimcə, bütün Avropa qitəsinin uzunmüddətli davamlı enerji inkişafı üçün mühüm layihədir” – nazir bildirib.

Birinci vitse-baş nazirin qiymətləndirməsinə əsasən, hər bir iştirakçı ölkənin çox əhatəli enerji təşviqi gündəliyi var və Gürcüstan da onun bir hissəsidir.

Nazirlər görüşü çərçivəsində Avropa komissarı Dan İorqensen üçün Azərbaycan, Gürcüstan, Rumıniya və Macarıstan tərəfindən birgə məktub imzalanıb və bu məktubda təkcə regionun deyil, həm də Avropanın enerji təhlükəsizliyi və yaşıl enerji gələcəyi üçün həyati əhəmiyyət kəsb edən Qara dəniz sualtı kabel layihəsinə Avropa İttifaqının daha çox dəstəyinin əhəmiyyəti vurğulanıb.

Məlumatı İqtisadiyyat Nazirliyinin mətbuat xidməti yayır.