Levan Davitaşvili Gürcüstanın iqtisadiyyat naziri vəzifəsindən istefa verib və bundan sonra iqtisadi məsələlər üzrə baş nazirin baş məsləhətçisi və İqtisadi Şuranın katibi postunu tutacaq.

Bu barədə Gürcüstanın baş naziri İrakli Kobaxidze bu gün keçirdiyi brifinqdə bildirib.

“O bildiyiniz kimi, ölkənin iqtisadi inkişafı bizim əsas prioritetimizdir. Məhz iqtisadiyyatın inkişafından asılıdır əhalinin həyat səviyyəsinin yaxşılaşması ilə yanaşı, hər bir sahənin inkişafı, Gürcüstanın demokratik sisteminin möhkəmlənməsi və həmçinin xarici siyasi mövqelərimizin güclənməsi. Ölkənin iqtisadi siyasətinin planlaşdırılması və həyata keçirilməsi sisteminin təkmilləşdirilməsi məqsədilə İqtisadi Şuranın gücləndirilməsi barədə qərar qəbul etdik. Bu məqsədlə İqtisadi Şuranın funksiyaları və tərkibi yenidən nəzərdən keçiriləcək. Gürcüstanın baş naziri tərəfindən iqtisadi məsələlər üzrə baş məsləhətçi və İqtisadi Şuranın katibi vəzifələrini Levan Davitaşvili icra edəcək. Nazirliyin idarə olunması gündəlik ağır və yorucu işlərlə bağlıdır. Bu rutin işlərdən azad olmaq cənab Levanın ölkənin iqtisadi inkişafının daha da sürətləndirilməsi, ölkəyə investisiyaların cəlb olunması və digər uyğun effektiv addımlar atılması istiqamətində daha uğurlu fəaliyyət göstərməsinə imkan yaradacaq. Cənab Levan yüksək və fərqli ixtisasa malik iqtisadçıdır və düşünürük ki, o, bu vəzifədən bu missiyanı ən yaxşı şəkildə yerinə yetirə biləcək. Bu isə ölkənin iqtisadi inkişafının daha da sürətləndirilməsinə və investisiyaların cəlbinə töhfə verəcək. Cənab Levanı bu məsuliyyətli vəzifədə uğurlar arzulayıram”, – deyə baş nazir bildirib.

Levan Davitaşvili 2022-ci il fevralın 9-dan etibarən Gürcüstanın iqtisadiyyat və dayanıqlı inkişaf naziri, 2021-ci il iyulun 12-dən isə Gürcüstanın baş nazirinin müavini idi.