Gürcüstanın maliyyə naziri Laşa Xutsişvili Gəlirlər Xidmətinin əməkdaşlarına yeni rəhbəri Mixeil Mağlakelidzeni təqdim edib. O, bu vaxta qədər Maliyyə Nazirliyinin İstintaq Xidmətinin rəhbəri vəzifəsini tutub.

Maliyyə Nazirliyində keçirilən görüşdə xidmətin sabiq rəhbəri İrakli (Daçi) Beraia, maliyyə nazirinin müavinləri Qiorqi Kakauridze və Mamuka Barataşvili, eləcə də Gəlirlər Xidmətinin struktur bölmələrinin rəhbərləri iştirak ediblər.

Maliyyə naziri Laşa Xutsişvili İrakli (Daçi) Beraiaya xidmətinə görə təşəkkür edib və ona Dövlət Audit Xidmətinin rəhbərinin birinci müavini vəzifəsində uğurlar arzulayıb.

O, görüşdə bir daha Gəlirlər Xidmətinin fəaliyyətinin ölkənin inkişafı üçün əhəmiyyətini vurğulayıb və effektiv vergi və gömrük administrasiyasına kömək edəcək bütün islahatların davam etdiriləcəyinə ümid etdiyini bildirib.

Onun qeyd etdiyi kimi, Mixeil Mağlakelidze illər ərzində qurumda müxtəlif vəzifələri tutduğu üçün Gəlirlər Xidmətinin sistemi ilə yaxşı tanışdır.

Laşa Xutsişvili onun peşəkarlığını vurğuladı və yeni vəzifəsi dövründə də uğurlu fəaliyyətinin davam edəcəyinə ümid etdiyini bildirib.

Öz növbəsində Mixeil Mağlakelidze etimada görə minnətdarlığını ifadə edib və qeyd edib ki, Gəlirlər Xidməti qurumun əməkdaşları ilə birlikdə yenə də ölkənin iqtisadi inkişafını dəstəkləməyə davam edəcək.

Görüşdə Gəlirlər Xidmətinin sabiq rəhbəri İrakli (Daçi) Beraia həmkarlarına dəstəyə görə təşəkkür edib və xidmət əməkdaşlığının gələcəkdə də fəal şəkildə davam edəcəyinə ümid etdiyini deyib. O, Mixeil Mağlakelidzeyə yeni vəzifəsində uğurlar arzulayıb.

Məlumatı Maliyyə Nazirliyinin mətbuat xidməti yayır.