Bütün maliyyə institutları nəinki cari əməkdaşlığı davam etdirməyə, həm də yeni layihələri maliyyələşdirməyə hazır olduğunu bildirir – bu barədə Gürcüstanın maliyyə naziri Laşa Xutsişvili “Gürcüstanın maliyyə və investisiya siyasəti” forumunda deyib.

Laşa Xutsişvili forumun açılışını edib və ölkə iqtisadiyyatında mövcud vəziyyət, makroiqtisadi parametrlər və orta müddətli proqnozlar barədə danışıb.

Bununla yanaşı, maliyyə naziri iştirakçılara cari ilin aprel və may aylarında beynəlxalq maliyyə təşkilatlarının (EBRD, ADB, WB, IMF, AIIB) illik görüşləri çərçivəsində Maliyyə Nazirliyi tərəfindən aparılan danışıqlar barədə məlumat verib.

Laşa Xutsişvilinin qeyd etdiyi kimi, Gürcüstan iqtisadiyyatı son dörd il ərzində iqtisadiyyatın gücünün fundamental məsələlərinə aid müəyyən çağırışlarla üzləşib.

“Gələcək inkişaf üçün zəmin yaratmaq naminə ilk növbədə ölkə makroiqtisadi sabitliyə və fiskal dayanıqlığa nail olmalı idi. Çünki əgər ölkədə makroiqtisadi və fiskal sabitlik yoxdursa, iqtisadi strategiyanın əsaslana biləcəyi digər hər şey möhkəm və uzunmüddətli ola bilməz. Son dörd ildə ölkə üzərində güclü iqtisadi gələcəyin qurulmasının mümkün olduğu tam şəkildə makroiqtisadi sabitliyə nail oldu. Büdcə kəsiri 9.3%-dən 2.4%-ə qədər azaldı, 60%-ə qədər olan xarici borcun göstəricisi 36%-ə qədər azaldı – dörd ildə ÜDM-ə nisbətdə demək olar ki, yarıya endi, əvvəllər ikirəqəmli olan cari hesab kəsiri indi 4,4%-lə tarixi minimuma çatıb. İnflyasiya göstəricisi hədəfə yaxındır və bütün makroiqtisadi parametrlər normal həddədir” – maliyyə naziri qeyd edib.

O bildirib ki, Gürcüstan qısa müddət ərzində fiskal sabitliyi bərpa edə bilmiş nadir ölkələrdən biridir ki, bu da onu maliyyə institutları üçün ən yaxşı tərəfdaşlardan birinə çevirir.

Bununla yanaşı, Laşa Xutsişvili çıxışında Beynəlxalq Valyuta Fondunun iki həftəlik missiyasının nəticələri və verilən qiymətləndirmələrdən danışıb. O bildirib ki, Fond cari prosesdə Maliyyə Nazirliyinin malik olduğu bütün maliyyə-iqtisadi parametrləri və proqnozları təsdiqləyib.

İqtisadi Forum və “Business Insider Georgia”nın təsisçisi və rəhbəri Qiorqi Abaşişvili, Parlamentin Sahə İqtisadiyyatı və İqtisadi Siyasət Komitəsinin sədri Şota Berekaşvili və “Orbi Group”un baş direktoru İrakli Kverğelidze panel müzakirəsində iştirak ediblər.