Birinci Universitet Klinikasının klinik direktoru Lali Turdzeladzenin verdiyi məlumata əsasən, Acara hökumətinin sabiq sədri Tornike Rijvadzenin müalicə üçün Türkiyəyə aparılması ailənin istəyi ilə olub.

O, Tornike Rijvadzenin sağlamlıq vəziyyətinin yaxşılaşdığını deyib.

“Ailənin tələbi ilə dünən gecə saat 02:00-da Tornike Rijvadze hava yolu ilə İstanbulun xəstəxanasına aparıldı. Bu, tamamilə onların xahişi idi. Əvvəllər də bu mövzuda söhbət olmuşdu. Dünən bu barədə deməmişik, çünki yekun qərar qəbul etməmişdilər. Gecə gec saatda qərar qəbul etdilər, özləri reanomobil çağırdılar, təyyarə oradan uçdu və Tornike Rijvadzeni apardılar. Vəziyyət tamamilə stabil idi. Oyananda ünsiyyət qururdu, göstəriciləri yaxşılaşmışdı, lakin süni tənəffüs aparatına qoşulu saxladıq, çünki aparılması planlaşdırılırdı və uçuş zamanı aparatdan ayırmaq olmaz. Əlbəttə, ağır pasiyentdir, süni tənəffüs aparatına qoşuludur, lakin göstəricilər yaxşılaşmışdı və tam şəkildə ünsiyyət qururdu. Ailənin tələbi ilə köçürülmə həyata keçirildi. Dünən nə Levan Ratiani, nə də cənab baş nazir dedi, çünki ailə yekun qərar verməmişdi. Daha sonra qərar qəbul etdilər. Vəziyyəti stabil idi, əks halda aparmazdılar, çünki hava yolu ilə getməli idi. Tamamilə stabil göstəriciləri var idi və xeyli yaxşılaşmış göstəricilərlə aparıldı. Bizim ailənin qərarına qarşı çıxmaq hüququmuz yoxdur. Ailə necə istəyirsə, müalicə elə aparılmalıdır, bu, onların hüququdur” – Lali Turdzeladze bildirib.

Acara hökumətinin sabiq sədri Tornike Rijvadzeni müalicə üçün Türkiyəyə aparıblar. Bu haqda bir neçə saat əvvəl məlum olub.

Tornike Rijvadze güllə yarası ilə əvvəlcə Saqareconun “Geo Hospitals”ına yerləşdirilib, daha sonra isə Birinci Universitet Klinikasına yerləşdiriblər. Tornike Rijvadzenin işi üzrə istintaq Gürcüstan Cinayət Məcəlləsinin 115-ci maddəsi ilə başladılıb, bu isə özünü öldürmə həddinə çatdırmanı nəzərdə tutur. Həkimlərin bəyanatına əsasən, Tornike Rijvadzenin sağlamlıq vəziyyəti müsbət dinamika ilə xarakterizə olunur, o, ünsiyyət qurur və sadə tapşırıqları yerinə yetirir.

Odlu silahın diqqətsiz saxlanılması faktına görə, Dəniz Nəqliyyatı Agentliyinin rəhbəri Aleksi Axvledianiyə qarşı ittiham irəli sürülüb. Məhkəmə dünən onun barəsində qətimkan tədbiri olaraq 30 000 lari girov təyin edib və məhkəmə zalından azadlığa buraxıb.