Gürcüstan Konstitusiya Məhkəməsi parlamentin 88 üzvünün konstitusiya iddiasını dərc edib. İddia, siyasi partiyaların (“Birlik – Vahid Milli Hərəkat”, “Dəyişikliklər üçün Koalisiya – Gvaramiya Melia Girchi Dəyişmək Vaxtıdır”, “Güclü Gürcüstan – Lelo, Xalq üçün, Azadlıq üçün”) fəaliyyətinin konstitusiyaya uyğunluğu və onların qadağan olunması məsələsinə aiddir.

Konstitusiya iddiası bir neçə bölmədən ibarətdir: Gürcüstan Konstitusiyasına və Avropa İnsan Hüquqları Məhkəməsinin yanaşmalarına dair hissə, qeyri-konstitusion siyasi partiyalar barədə məsələlər, Gürcüstanın konstitusion quruluşunun devrilməsi və zorakı şəkildə dəyişdirilməsi, insan hüquqlarının sistemli və ardıcıl şəkildə pozulması, Gürcüstanın müstəqilliyinə qəsd, ölkənin ərazi bütövlüyünün pozulması, 2008-ci ilin avqust müharibəsi ilə bağlı hadisələr, 2012-ci ildən sonrakı proseslər.

Habelə, iddianın tələb hissəsində qeyd olunur:

“Yuxarıda göstərilən siyasi partiyaların fəaliyyəti Gürcüstanın konstitusion quruluşunun devrilməsi və zorakı yolla dəyişdirilməsinə, Gürcüstanın müstəqilliyinin sarsıdılmasına və ərazi bütövlüyünün pozulmasına yönəldiyi üçün, aşağıdakı siyasi partiyaların fəaliyyəti qeyri-konstitusion hesab edilsin, onlar qadağan edilsin və onların qeydiyyatı ləğv edilsin:

Vətəndaşların siyasi birliyi “Birlik − Vahid Milli Hərəkat” (identifikasiya nömrəsi: 200078888; qeydiyyat tarixi: 10.12.2004; hüquqi ünvan: Tbilisi, Kaxeti magistral yolu 45a);

Vətəndaşların siyasi birliyi “Dəyişikliklər üçün Koalisiya – Gvaramiya Melia Girchi Dəyişmək Vaxtıdır” (identifikasiya nömrəsi: 415030022; qeydiyyat tarixi: 29.06.2016; hüquqi ünvan: Tbilisi, Besiki küçəsi №4, mənzil №66);

Vətəndaşların siyasi birliyi “Güclü Gürcüstan – Lelo, Xalq üçün, Azadlıq üçün!” (identifikasiya nömrəsi: 415030264; qeydiyyat tarixi: 28.01.2020; hüquqi ünvan: Tbilisi, Dəmir yolunun Mərkəzi Vağzalı, sahə 05/107).

Konstitusiya iddiasına əlavə olunur: 2003–2012-ci illərdə fəaliyyət göstərmiş rejim və bu rejimin siyasi vəzifəli şəxslərinin, eləcə də siyasi partiyalarda birləşmiş hazırkı və keçmiş vəzifəli şəxslərin fəaliyyətini araşdıran Gürcüstan Parlamentinin müvəqqəti istintaq komissiyasının nəticələri; siyasi partiyaların qeydiyyat şəhadətnamələri (qeydiyyatı təsdiq edən sənədlər); dövlət rüsumunun ödənilməsini təsdiq edən sənəd; konstitusiya iddiasının elektron versiyası.