Konfrans Liqası | “Dinamo Tbilisi” “Jalgiris”i məğlub edərək növbəti mərhələyə doğru böyük addım atdı

Konfrans Liqası | “Dinamo Tbilisi” “Jalgiris”i 3:0 hesabı ilə məğlub etdi
“Dinamo Tbilisi” UEFA Konfrans Liqasının II təsnifat mərhələsinin ilk oyununda Litvanın “Jalgiris” klubunu qəbul edərək 3:0 hesablı inamlı qələbə qazandı.

Temur Ketsbayanın rəhbərlik etdiyi komandaya uzun müddət zədə səbəbindən yaşıl meydanlardan uzaq qalan Caba Kankava da qayıdıb və oyunun iştirak ərizəsinə daxil edilib.

Qarşılaşmadan əvvəl tribunada xoş mənzərə yaşanıb. Əvvəlcə “Dinamo” azarkeşləri “Litva! Litva!”, litvalı azarkeşlər isə cavab olaraq “Gürcüstan! Gürcüstan!” şüarlarını səsləndiriblər. Bu, iki klubun azarkeşləri arasında formalaşmış dostluq ənənəsinin davamı kimi qiymətləndirilir.

Tbilisi təmsilçisi oyuna fəal başlayaraq ilk dəqiqələrdən üstünlüyü ələ alıb. Tornike Kvaratsxeliya bir neçə rəqibini driblinqlə keçərək Leo Santosu əlverişli mövqeyə çıxarsa da, braziliyalı hücumçu qapıçını keçə bilməyib. İki dəqiqə sonra Santos yenidən qapıçı ilə təkbətək qalsa da, qonaqlar bu epizodda da təhlükəni sovuşdurublar.

Bu hücumdan sonra təyin olunan künc zərbəsindən sonra matçın 14-cü dəqiqəsində Numan Kurdiç baş zərbəsi ilə hesabı açaraq “Dinamo Tbilisi”ni önə keçirib.

26-cı dəqiqədə Nika Ninuanın dəqiq ötürməsindən sonra Leo Santos qapıçı ilə üz-üzə qalsa da, ilk zərbəsində yenə də qolkiperi keçə bilməyib. Lakin qapıçının qaytardığı topu təkrar zərbə ilə tora göndərərək hesabı 2:0 edib.
41-ci dəqiqədə isə Ninuanın cərimə zərbəsindən sonra top “Jalgiris”in qapı dirəyinə dəyib. Epizodun davamında Nikolaz Uqrexelidze topu tamamlayaraq komandasının üçüncü qolunu vurub.

İkinci hissədə hesab dəyişməyib. Meydan sahibləri oyunu inamla nəzarətdə saxlayaraq qarşılaşmanı 3:0 hesablı qələbə ilə başa vurublar.

“Dinamo Tbilisi” cavab oyununu 30 iyul tarixində Kaunas şəhərində “Jalgiris”ə qarşı keçirəcək. Bu cütün qalibi növbəti mərhələdə Xorvatiyanın “Hayduk” klubu ilə Kiprin “Pafos” komandası arasındakı cütün qalibi ilə qarşılaşacaq.