Kit Keloqi gələn həftə Donald Trampın komandasının Ukraynada atəşkəslə bağlı danışıqlar aparmaq üçün Londona yola düşəcəyini bildirir

Gələn həftə ABŞ Prezidenti Donald Trampın komandası Ukraynada atəşkəslə bağlı danışıqlar aparmaq üçün Londona yola düşəcək – bu barədə ABŞ Prezidentinin xüsusi nümayəndəsi Kit Keloqi “Fox News”a müsahibəsində bildirib.

Keloqi deyib ki, Parisdə keçirilən görüş zamanı Ukrayna və ABŞ nümayəndə heyətləri “atəşkəsin potensial imkanından danışıblar”.

“Məhz bu səbəbdən bu müqavilələri yekunlaşdırmaq üçün biz bu həftə Londona qayıdırıq. Və inanıram ki, böyük imkanlar var. İnanıram ki, bizim kifayət qədər yaxşı konturlarımız var. Faydalı qazıntılar haqda razılaşma onlardan biridir. Həmçinin, hərtərəfli atəşkəsdən söz gedir. “Hərtərəfli” deyəndə, dəniz, hava, quru və sənayeni nəzərdə tuturam – ən azı 30 gün müddətinə, tədricən davamlı sülhə keçid imkanı ilə, daimi razılaşmaya. Düşünürəm ki, biz düzgün yoldayıq” – Keloqi qeyd edib.

Bununla yanaşı, Kit Keloqi bildirib ki, ABŞ dövlət katibi Marko Rubionun ABŞ Prezidenti Donald Trampın səbrinin tükəndiyi və sülh danışıqlarından geri çəkilə biləcəyi barədə bəyanatı “sərt səslənir”, lakin “bu bəyanat məhz bu cür olmalıdır”.

“Biz baş verənlərdən yorulmuşuq. Dünyada Amerika Birləşmiş Ştatlarının iştirak etməli olduğu bir çox başqa problemlər var və bu müharibə çox uzun müddətdir ki, davam edir. Lakin düşünürəm ki, bunu bitirmək imkanı var” – Keloqi bildirib.

Xatırladaq ki, aprelin 17-də Ukrayna və Amerika Birləşmiş Ştatları faydalı qazıntılar haqda razılaşmanın bağlanmasına dair memorandum imzalayıblar. ABŞ Prezidenti Donald Tramp aprelin 24-də ABŞ və Ukraynanın faydalı qazıntılar haqda razılaşmanı bağlayacağını açıqlayıb.