Kit Kelloq – Üç günlük atəşkəs absurddur, prezident Tramp Ukraynada atəşin daimi, hərtərəfli dayandırılmasını istəyir

ABŞ prezidentinin xüsusi nümayəndəsi Kit Kelloq bəyan edib ki, Vladimir Putinin təklif etdiyi “üç günlük atəşkəs” absurddur və Donald Tramp atəşin daimi, hərtərəfli dayandırılmasını istəyir.

Bu barədə Kit Kelloq “Fox News” kanalının efirində bildirib.

Kit Kelloq qeyd edib ki, Donald Tramp prezidentliyinin ilk 100 günü ərzində Ukrayna məsələsində əvvəlki administrasiyanın 1200 gündə əldə etdiyindən daha çox nailiyyət əldə edib.

Kit Kelloq bildirib ki, keçən həftə Londonda ukraynalılarla çox səmimi və açıq söhbət baş tutdu, bu zaman amerikalı tərəf 22 bənddən ibarət konkret addımlar təklif etdi. Eyni zamanda o qeyd etdi ki, Ukrayna bu bəndlərin hamısını bəyənmir, lakin bu normaldır, çünki danışıqlar prosesi davam edir.

“Üç günlük atəşkəs absurddur. Prezidentin istədiyi isə odur ki, atəş daimi və hərtərəfli dayandırılsın – dənizdə, quruda, havada və infrastrukturda, ən azı 30 gün müddətinə və sonra bunu uzada bilərik,” – deyə Kelloq bildirib.

Trampın xüsusi nümayəndəsinin qeyd etdiyinə görə, bir tərəf atəşin dayandırılmasına razılıq verib, indi Rusiyanın razılığı lazımdır.

“Düşünürəm ki, buna yaxınlaşırıq,” – deyə Kit Kelloq bildirib.

Xatırladaq ki, Rusiya prezidenti Vladimir Putin İkinci Dünya Müharibəsində qələbənin 80 illiyinin qeyd olunması günlərində, 8-11 may tarixlərində Ukraynada atəşkəs elan etmişdi.