“Ölkəyə maneələr yaradılır, o, mənəvi dilemma qarşısında qoyulur, bu, əllərin burulması və şantajdır. Mən bunu demək üçün Gürcüstana gəlmişəm”, – bu sözləri Xorvatiya Respublikasının Prezidenti Zoran Milanoviç Gürcüstan Prezidenti Mixeil Kavelaşvili ilə birgə keçirdiyi brifinqdə deyib.

Onun sözlərinə görə, Avropa İttifaqı ilə çətinlikləri olan bir ölkəyə təzyiq göstərilməsi qəbuledilməzdir.

“Mən Avropa İttifaqına üzv olan digər ölkələrdən nazirlərin Gürcüstana mitinqlərdə iştirak etmək və müxalifətə qoşulmaq üçün gəldiyini gördüm. Düşündüm ki, həmin siyasətçilər mənim ölkəmə, paytaxtıma, mərkəzi meydana gəlsəydilər, mən özümü necə hiss edərdim? Onların kim olması fərq etməz, Gürcüstanda siyasi tərəflər məni maraqlandırmır, heç bir tərəfin yanında dayanmaq olmaz. Mənim üçün kiçik, siyasi baxımdan təcrid olunmuş və Avropa İttifaqı ilə çətinlikləri olan bir ölkəyə təzyiq göstərilməsi ideyasının özü qəbuledilməzdir.

Bütün parametrlər baxımından Gürcüstan uğurla inkişaf edir, yüksək iqtisadi artım tempinə malikdir. Razıyam ki, artım tempi ən vacib göstəricidir, o, iqtisadi fəallığın və ticarətin inkişafını göstərir. Bu baxımdan Gürcüstan uğurludur və yüksək artım nümayiş etdirir. Bu, üçüncü dünya ölkəsidir, iqtisadi baxımdan çətinlikləri və maneələri olub. Lakin iqtisadiyyata gəldikdə, ölkə uğurludur və biz bunu dəstəkləməliyik, əlbəttə ki, şərtsiz deyil. Dünyada şərtsiz heç nə yoxdur. Biz bu faktı dəstəkləməliyik. Ölkəyə maneələr yaradılır, onu Moskvanın agenti olmaqda ittiham edirlər. Bu, mənəvi şantajdır. Onlar bu ölkəni şantaj edir, təzyiq göstərirlər. Mən bunu demək üçün Gürcüstana gəlmişəm”, – deyə Zoran Milanoviç bildirib.