Xarici İşlər Nazirliyi – Britaniyanın səfiri ilə söhbət zamanı qeyd olunub ki, “SILVAR” gəmisi ilə bağlı səfirliyin bəyanatının ruhu qəbuledilməzdir və manipulyativ əməllər iki ölkə arasındakı münasibətlərə kölgə salır

Böyük Britaniyanın Gürcüstandakı səfiri Qaret Uord Gürcüstanın xarici işlər nazirinin birinci müavini Qiorqi Zurabaşvili ilə görüşə dəvət olunub – bu haqda məlumatı Gürcüstanın Xarici İşlər Nazirliyi yayır.

Onların məlumatında görüşdə Gürcüstan tərəfindən beynəlxalq sanksiyalar rejimlərinə riayət olunması məsələsinə, Gürcüstan hökumətinin və müvafiq dövlət qurumlarının bu istiqamətdəki fəaliyyətinə toxunulduğu deyilir.

“Qeyd edilib ki, Gürcüstan tərəfindən beynəlxalq sanksiyaların pozulması ilə bağlı heç bir faktın mövcud olmadığı və Gürcüstan hakimiyyətinin beynəlxalq tərəfdaşlarla maneəsiz əməkdaşlıq etdiyi bir şəraitdə, sözügedən məsələ ilə əlaqədar daimi spekulyasiyalar anlaşılmazdır.

Bu kontekstdə, Böyük Britaniya tərəfindən “SILVAR-шы” (IMO 9291262) gəmisinə sanksiya tətbiq edilməsi məsələsi ilə bağlı səfirliyin yaydığı bəyanatda yanlış rəyin formalaşmasına və Gürcüstanın maraqlarına zərər vurulmasına məqsədyönlü şəkildə xidmət edən vurğunun Gürcüstan üzərinə qoyulması narahatlıq doğurur” – Xarici İşlər Nazirliyi tərəfindən yayılmış məlumatda qeyd olunub.

Onların məlumatına əsasən, nazirin birinci müavini qeyd edib ki, gəminin Gürcüstana daxil olduğu və fəaliyyət göstərdiyi dövrdə ona qarşı heç bir beynəlxalq sanksiya tətbiq edilməməsinə, gəminin “Lloyd’s Register”in (Birləşmiş Krallıq) qüvvədə olan sinifinə malik olmasına, çoxsaylı beynəlxalq dəniz ticarəti marşrutlarında fəaliyyət göstərməsinə və həm Avropa, həm Asiya, həm də Afrika limanlarına, o cümlədən Malta, Danimarka (Skaqen), Misir, Malayziya, Hindistan, Çin və digər ölkələrə daxil olmasına baxmayaraq, səfirlik tərəfindən yayılmış bəyanatda Gürcüstanın adının çəkilməsi qəbuledilməzdir. Bununla yanaşı, Gürcüstanın bütün səlahiyyətli orqanları qüvvədə olan milli və beynəlxalq öhdəliklərə tam əməl edərək hərəkət ediblər.

“Britaniya tərəfinə o da yaxşı məlumdur ki, Gürcüstana daxil olmazdan cəmi bir neçə həftə əvvəl sözügedən gəmi Danimarka Krallığında dövlət liman nəzarəti təftişindən keçib və bu yoxlama çərçivəsində gəmi saxlanılmayıb. Bu da onun beynəlxalq dəniz təhlükəsizliyi və texniki nəzarət tələblərinə uyğunluğunu sübut edir” – Xarici İşlər Nazirliyinin məlumatında qeyd olunub.

Onların məlumatına əsasən, Qiorqi Zurabaşvili Böyük Britaniyanın səfiri ilə söhbətində səfirliyin bəyanatının ruhunun qəbuledilməz olduğunu və bu cür manipulyativ əməllərin Gürcüstan ilə Birləşmiş Krallıq arasındakı münasibətlərə kölgə saldığını qeyd edib.

“Görüşün sonunda konstruktiv əməkdaşlığın əhəmiyyəti vurğulanıb” – Xarici İşlər Nazirliyinin məlumatında qeyd olunub.

Məlumat üçün bildirək ki, Britaniyanın Gürcüstandakı səfirliyi iyunun 16-da “SILVAR” gəmisinin yeni sanksiyalar paketinə daxil edilməsi barədə məlumat yayıb.