Avropalı bürokratlar seçkilərdə məğlub oldular, gürcü xalqı onlara yox dedi. Onları dəli edən məhz budur və buna görə bizi şantaj edirlər – bu barədə paytaxtın meri Kaxa Kaladze Avropa Parlamenti tərəfindən Gürcüstanla bağlı hazırlanmış qətnamə ilə bağlı suala cavabında deyib.

O bildirib ki, bəzi avropalı bürokratın hakimiyyətlə şantaj dili ilə danışmasına baxmayaraq, Gürcüstanın maraqları güzəştə gedilməyəcək.

“Bütün məsuliyyət gürcü xalqı və gürcü dövləti ilə şantaj dili ilə danışan bəzi ərköyün, korrupsiyalaşmış avropalı bürokratın üzərinə düşür. Biz heç kimə buna imkan verməyəcəyik. İstər Avropaya inteqrasiya məsələsi ilə bizi şantaj etsinlər, istərsə də şəxsən, Gürcüstanın maraqları güzəştə gedilməyəcək. Biz bu cür qətnamələri çox görmüşük, çox şantajlar yadımızdadır. Əvvəlcə namizəd statusu mövzusu ilə bizi şantaj edirdilər, sonra danışıqların açılması mövzusu ilə, indi isə vizanın liberallaşdırması və Assosiasiya sazişini irəli sürürlər. Əgər kiminsə Gürcüstanın Avropaya inteqrasiya istiqamətində nə etdiyini görmək istəyi varsa, əmin olacaq ki, biz qabaqcıl ölkəyik. Atılmış addımlar və öhdəliklərin yerinə yetirilməsi baxımından biz, namizəd statusunu bizdən əvvəl almış ölkələrdən öndəyik. Burada fərqli vəziyyət var – Gürcüstana qarşı fərqli münasibət bəsləyirlər. Avropalı bürokratlar radikal qruplarla birlikdə seçkilərdə məğlub oldular, gürcü xalqı onlara yox dedi. Onları dəli edən məhz budur və buna görə bizi şantaj edirlər” – Tbilisinin meri qeyd edib.