Kaxa Kaladze – 2008-ci ildən sonra əvvəlki hakimiyyətin “sahibləri”nin tapşırığı Rusiya ilə münasibətləri yumşaltmaq üçün hər şeyi etmək idi

Rusiya-Ukrayna müharibəsi başladıqdan sonra xarici qüvvələrin tapşırığına uyğun olaraq müxalifətin mesaj qutusu dəyişdi – Tbilisinin meri Kaxa Kaladze medianın müxalifətdə antirusiya ritorikasının dəyişməsi ilə bağlı sualına bu şəkildə münasibət bildirib.

Onun izahatına əsasən, keçmiş hakimiyyət nümayəndələrində antirusiya ritorikası Avqust müharibəsindən sonra deyil, Rusiya-Ukrayna müharibəsi başladıqdan sonra aktivləşib.

“2008-ci ildən sonra əvvəlki hakimiyyətin “sahibləri”nin tapşırığı Rusiya ilə münasibətləri yumşaltmaq üçün hər şeyi etmək idi. Ərazilərimizi, əsgərlərimizi və dinc sakinlərimizi itirdik, lakin Saakaşvili hakimiyyətinin Rusiyaya qarşı ritorikasını, onların rəsmi məktublarını xatırlayırıq. Rusiyada gürcü müğənnilərin konsertləri keçirilirdi. Onların “sahibləri” tərəfindən həmin vaxt belə tapşırıq var idi, belə davranmalı idilər. Rusiya-Ukrayna müharibəsi alovlandıqdan sonra isə mesaj qutusu dəyişdi. “Sahiblər” tərəfindən başqa bir tapşırıq gəldi, bunu da hər gün görürük” – Kaxa Kaladze bildirib.