Avropa İttifaqı potensial təhlükələrin monitorinqi və kritik infrastrukturu qorumaq üçün Qara dənizdə dəniz təhlükəsizliyi mərkəzi yaratmaq istəyir. Bu barədə Avropa İttifaqının xarici siyasət və təhlükəsizlik məsələləri üzrə ali nümayəndəsi Kaia Kalas Qara dənizin strategiyası haqda danışdığı mətbuat konfransında deyib.

“Mərkəz Qara dənizdə erkən xəbərdarlıq sistemi olacaq. O, dəniz qurğuları və sualtı kabellər kimi kritik infrastrukturun qorunmasında bizə kömək edəcək. Mərkəz, həmçinin Rusiya və Ukrayna arasında sülhün monitorinqində bizə kömək edəcək” – Kaia Kalas qeyd edib.

Kalasın qeyd etdiyi kimi, Qara dəniz regionu Avropa İttifaqı üçün strateji əhəmiyyət daşıyır, çünki Avropa ilə Mərkəzi Asiyanı birləşdirir. O bildirib ki, Qara dənizin təhlükəsizliyi Avropanın təhlükəsizliyi üçün həyati əhəmiyyət kəsb edir.

“Qara dəniz regionu Avropa İttifaqı üçün strateji əhəmiyyət daşıyır, çünki Avropa ilə Mərkəzi Asiyanı birləşdirir. Bu təhlükəsizlik, ticarət və enerji baxımından, eləcə də region ölkələrinin Avropa İttifaqı ilə əlaqələrini gücləndirdiyini nəzərə alsaq vacibdir. Geosiyasi dəyişikliklər hiss olunur. Ukrayna və Moldova Avropa İttifaqı üzvlüyünə doğru irəliləyirlər. Həmçinin, Gürcüstan, əgər o, Avropa İttifaqının yoluna qayıdarsa. Bundan əlavə, Türkiyə mühüm tərəfdaş və namizəd ölkədir. Lakin, Rusiyanın müharibəsi, hava məkanının tez-tez pozulması, limanlara və dəniz marşrutlarına edilən hücumlar regionun potensialına kölgə salır” – Kalas bildirib.

Avropalı diplomat bildirib ki, Qara dənizin yeni strategiyası Qara dəniz ölkələri üçün əməkdaşlığın gücləndirilməsi üçün bir növ dəvətdir. Kalas qeyd edib ki, Avropa İttifaqı Qara dəniz regionunun tərəfdaşları ilə sıx əməkdaşlıq və məlumat mübadiləsində istəklidir. Kaia Kalasın izahatına əsasən, bu strategiya nəticəsində Qara dəniz regionunun bütün ölkələri fayda əldə edə bilər.

Bununla yanaşı, Kalas qeyd edib ki, bu mərkəzin harada yerləşməsi ilə bağlı Avropa İttifaqına üzv ölkələr arasında müzakirə aparılacaq.