Avropa İttifaqının ali nümayəndəsi Cozef Borrell Gürcüstanda seçkilərdən sonra inkişaf edən hadisələrlə bağlı bəyanat yayır.

Borrellin bəyanatında deyildiyi kimi, Gürcüstanın Mərkəzi Seçki Komissiyası və aidiyyatı qurumlar müşahidəçilər tərəfindən qeydə alınan qanun pozuntularını, təzyiq və ictimaiyyətin prosesə inamına təsir edən seçicilərin qorxudulmasını araşdırmalıdırlar.

“Oktyabrın 26-da Gürcüstanda keçirilən parlament seçkilərindən sonra inkişaf edən hadisələr çox narahatedicidir, beynəlxalq müşahidəçilər seçki kampaniyası zamanı, eləcə də seçki günü pozuntular barədə məlumat verdilər. Həmçinin, onlar seçkiləri azad və ədalətli elan etmədilər. Mən şəffaf araşdırma tələb edirəm. Gürcüstanın Mərkəzi Seçki Komissiyası və aidiyyatı qurumlar müşahidəçilər tərəfindən qeydə alınan qanun pozuntularını, təzyiq və ictimaiyyətin prosesə inamına təsir edən seçicilərin qorxudulmasını araşdırmalıdırlar. Bu pozuntular sürətlə, şəffaf və müstəqil şəkildə aradan qaldırılmalıdır” – Borrell bildirir.

Cozef Borrellin bəyanatına əsasən, Gürcüstan Avropa İttifaqına namizəd ölkədir və seçki prosesinin tam şəffaflığından başlayaraq, Avropa dəyərlərinə sadiqliyini nümayiş etdirməlidir.

“Ədalətli seçkilər və qanunun aliliyinin qorunması demokratiyanın təməl daşı və Avropa İttifaqına üzvlük yolunun ayrılmaz hissəsi və əsasıdır. Mən bu gün Gürcüstandakı çətin vəziyyəti müzakirə etmək üçün Siyasi və Təhlükəsizlik Komitəsinin toplaşmasını xahiş etmişəm. Həmçinin, bu məsələni noyabr ayında Xarici İşlər Şurasının gündəliyinə daxil etdim. Gürcü xalqı aylar boyunca demokratik dəyərlərə və ölkələrinin Avropa İttifaqı yolunda irəliləməsinə sadiqliyini nümayiş etdirir. Onlar gələcək hökumətin legitimliyinə əmin olmaq üçün seçki prosesi ilə bağlı aydınlığa layiqdirlər. Etiraz aksiyaları və hökumətin onlara reaksiyasının dinc şəkildə qalması mühümdür. Ölkədəki demokratik geriləmə dəyişdirilməli, plüralist, demokratik cəmiyyəti yaradan media, vətəndaş cəmiyyəti və müxalifət üçün əlverişli mühit təmin edilməlidir” – Borrellin bəyanatında deyilir.