“Avropa Cənubi Qafqaz ittifaqı yarışında geri qalır” başlıqlı məqalə ilə Carnegie Europe geniş analitik yazı dərc edib. Məqalədə Gürcüstanla bağlı məsələlərə də xüsusi yer ayrılıb.

Yazıda qeyd olunur ki, ABŞ-ın vitse-prezidenti Cey Di Vensin Ermənistan və Azərbaycana səfəri, eləcə də “Tramp marşrutu” Vaşinqtonun regionla bağlı ambisiyalarını açıq şəkildə nümayiş etdirir. Bu isə Avropada Cənubi Qafqazla bağlı vahid strateji baxışın olmadığını göstərir.

“Məyusedici haldır ki, regionda daha çox maliyyə resurslarına malik olan Avropa ‘Tramp marşrutu’nun öz versiyasını yarada bilmədi. Avropa yenə də geri qalır”, – deyə məqalə müəllifi vurğulayır.

Müəllifin fikrincə, “Tramp marşrutu” sadəcə dəmir yolu bağlantısından daha geniş məna daşıyır. Bu səbəbdən Avropa İttifaqı gömrük terminallarının, skaner sistemlərinin, logistika mərkəzlərinin və rəqəmsal sərhəd infrastrukturlarının maliyyələşdirilməsi üçün “Cənubi Qafqaz Sərhəd İnfrastrukturu Fondu” yarada bilər.

Məqalədə qeyd olunur ki, daha geniş strateji və regional yanaşma Avropa İttifaqı üçün Gürcüstanla münasibətləri yenidən qurmaq imkanı yarada bilər. Bildirilir ki, 2025-ci ilin sonlarında genişlənmə məsələləri üzrə Avropa komissarı Marta Kos Avropa İttifaqı, Ermənistan, Azərbaycan və Türkiyəni əhatə edən dördtərəfli nəqliyyat ittifaqı formatını təklif edib.

“Bu, məntiqli təşəbbüsdür, lakin Gürcüstan olmadan regionun inteqrasiya xəritəsi natamam qalır”, – deyə Carnegie Europe-un məqaləsində vurğulanır.