İtaliya həbsxanalarında sıxlığı azaltmaq üçün narkotik və ya alkoqol asılılığı olan məhbusların cəzalarını evdə çəkmələrinə imkan verən qanun təsdiqlənib

İtaliya Parlamenti həbsxanalardakı sıxlığı azaltmaq üçün narkotik və ya alkoqol asılılığı olan minlərlə məhbusa cəzasını evdə çəkmək və reabilitasiya proqramlarına qoşulmaq imkanı verən qanun qəbul edib. Bu barədə “Reuters” məlumat yayır.

Məhbusların hüquqlarını müdafiə edən “Antigone” təşkilatının məlumatına əsasən, İtaliya həbsxanaları hazırda təxminən 140% sıxlıqla fəaliyyət göstərir.

“Reuters”in yazdığı kimi, bu, Fransa ilə birlikdə Avropa İttifaqında ən pis göstəricilərdən biridir. İtaliyanın ədliyyə naziri Karlo Nordionun bəyanatına əsasən, ölkə həbsxanalarında ümumilikdə təxminən 65 000 nəfərin saxlanıldığı bir vaxtda yeni qanun 10 000-dən çox narkotik asılılığı olan məhbusa şamil edilə bilər. Sənədə əsasən, təxminən 3 700 alkoqol asılılığı olan məhbus da bu imkandan yararlana bilər. Lakin “Antigone” təşkilatı bu proqnozlara skeptik yanaşır və qeyd edir ki, məhbusların azad olunması bir neçə şərtin yerinə yetirilməsindən asılı olacaq. Təşkilatın qiymətləndirməsinə əsasən, qanunla ayrılan maliyyə vəsaiti nəzəri olaraq yalnız 600-ə yaxın reabilitasiya yerinin maliyyələşdirilməsini təmin edir.