Gürcüstanın Maliyyə Nazirliyinin İstintaq Xidmətinin əməkdaşları, Dövlət Təhlükəsizliyi Xidməti və Gürcüstanın Baş Prokurorluğu ilə koordinasiyada, 2025-ci ilin sentyabrın 25-də məhkəmənin qərarı əsasında, xüsusilə külli miqdarda vergidən qəsdən yayınma faktı üzrə təqsirləndirilən şəxs qismində şirkətin rəhbərlərindən birini Türkiyə vətəndaşı O.B.-ni saxlayıblar, Gürcüstanın dövlət sərhədini tərk etmiş digər rəhbər şəxs B.P.-yə qarşı isə ittiham qiyabi şəkildə irəli sürülüb və onun barəsində axtarış elan ediləcək.

Maliyyə Nazirliyinin İstintaq Xidmətində keçirilmiş brifinqdə deyildiyi kimi, istintaqla müəyyən edilib ki, Tbilisidə qeydiyyatdan keçmiş şirkət illər ərzində Gürcüstanın Regional İnkişaf və İnfrastruktur Nazirliyi, Xaşuri və Çxorotsğu munisipalitetləri, Gürcüstanın Birləşmiş Su Təchizatı Şirkəti və SC “Gürcüstan Neft və Qaz Korporasiyası” tərəfindən elan olunmuş dövlət tenderlərində sistemli şəkildə iştirak edib və Gürcüstan miqyasında sahilbərkitmə işlərini yerinə yetirib.

“Şirkətin bəyan edilmiş dövriyyəsi 17 milyon laridən çoxdur. Şirkətin rəhbər şəxsləri fəaliyyətin həyata keçirilməsi prosesində və büdcə təşkilatlarından milyonlarla lari almaqla paralel olaraq, sistemli şəkildə büdcəyə ödənilməli olan vəsaiti düzgün bəyan etməmiş, bununla da dövlət büdcəsinə xüsusilə külli miqdarda vergi ödəməkdən qəsdən yayınıblar. Yoxlama nəticəsində vergiödəyiciyə dövlət büdcəsinin xeyrinə ümumilikdə 1 423 887.91 lari borc hesablanıb, o cümlədən əsas vergi şəklində 673 742 lari. İstintaq Gürcüstan Cinayət Məcəlləsinin 218-ci maddəsinin ikinci hissəsinin “b” yarımbəndi ilə aparılır, bu da cəza növü kimi 5 ildən 8 ilədək müddətə azadlıqdan məhrum etməni nəzərdə tutur. Gürcüstanın Maliyyə Nazirliyinin İstintaq Xidməti gələcəkdə də maliyyə-iqtisadi sahədə törədilən cinayətə qarşı sərt cəza siyasətini davam etdirəcək və sahibkarlıq subyektlərini dövlət büdcəsi qarşısında mövcud olan vergi borclarını vaxtında ödəməyə çağırır” – İstintaq Xidməti İdarəsinin rəis müavini Quqa Tavberidze bildirib.