İstintaq Xidməti gömrük sərhədindən külli miqdarda qızıl-zinət əşyalarının qanunsuz keçirilməsi faktı ilə bağlı bir nəfəri saxlayıb

Gürcüstan Maliyyə Nazirliyinin İstintaq Xidmətinin əməkdaşları Gəlirlər Xidmətinin Gömrük Departamentinin əməkdaşları ilə birgə və Baş Prokurorluğun koordinasiyası ilə həyata keçirilən əməliyyat-axtarış və istintaq tədbirləri nəticəsində gömrük sərhədindən külli miqdarda malın keçirilməsi qaydalarının pozulması faktı ilə bağlı bir nəfəri saxlayıb.
İstintaqla müəyyən edilib ki, Gürcüstan vətəndaşı “Sarpi” gömrük-keçid məntəqəsindən keçərkən idarə etdiyi avtomobilin salonunda xüsusi hazırlanmış gizli saxlanc yerlərindən istifadə etməklə 1 kiloqram 851 qram qızıl-zinət əşyasını gizli şəkildə ölkəyə keçirib.
Aşkarlanaraq götürülən zinət əşyalarının gömrük dəyəri 411 min 962 lari təşkil edir.
Faktla bağlı araşdırma Gürcüstan Cinayət Məcəlləsinin 214-cü maddəsinin 2-ci hissəsi ilə aparılır. Bu maddə 5 ildən 7 ilədək müddətə azadlıqdan məhrumetmə cəzasını nəzərdə tutur.
Məlumatı Gürcüstan Maliyyə Nazirliyinin İstintaq Xidmətinin mətbuat xidməti yayıb.