Gürcüstanın Maliyyə Nazirliyinin İstintaq Xidmətinin əməkdaşları keçirdikləri əməliyyat-axtarış tədbirləri və istintaq hərəkətləri nəticəsində, virtual aktiv xidmətinin qeydiyyatsız təminatçısının meneceri, xarici ölkə vətəndaşı S.P.-ni saxlayıblar.

Maliyyə Nazirliyinin İstintaq Xidmətinin məlumatına əsasən, istintaqla müəyyən edilib ki, istifadəçi xarici ölkədən Gürcüstana pul köçürmək məqsədi ilə virtual aktiv xidmətinin qeydiyyatsız təminatçısına müraciət edib. S.P., guya xidmət göstərmək məqsədi ilə köçürüləsi məbləği – 72 800 avronu xaricdə etibar etdiyi şəxsə verdirib.

“İstintaqla həmçinin müəyyən edilib ki, təqsirləndirilən şəxs xarici ölkədən verilmiş pul vəsaitinin ekvivalentində olan virtual aktivi alıb və istifadəçiyə nağd pulun verilməsi əvəzinə, həmin vəsaiti qanunsuz olaraq mənimsəyib. Törədilmiş cinayət əməli Gürcüstan Cinayət Məcəlləsinin 180-ci maddəsinin 3-cü hissəsinin “b” yarımbəndi ilə nəzərdə tutulur, bu da cəza olaraq altı ildən doqquz ilədək müddətə azadlıqdan məhrum etməni nəzərdə tutur. Cinayətdə iştirak edən digər şəxslərin, qeyri-qanuni sahibkarlıq fəaliyyəti və qanunsuz gəlirin leqallaşdırılması faktlarının aşkarlanması üçün istintaq davam edir” – məlumatda qeyd olunub.