İstintaq Xidməti kommersiya rüşvəti və saxta sənədlərin hazırlanması–satışı faktı üzrə iki nəfəri saxlayıb
Gürcüstanın Maliyyə Nazirliyinin İstintaq Xidmətinin əməkdaşları həyata keçirilmiş operativ-axtarış tədbirləri və istintaq hərəkətləri nəticəsində kommersiya rüşvəti, eləcə də saxta vergi sənədlərinin hazırlanması və satışı faktı üzrə iki nəfəri saxlayıblar. Bu barədə məlumatı İstintaq Xidməti yayıb.
Qurumun məlumatına görə, istintaq Gürcüstan Cinayət Məcəlləsinin 221-ci maddəsinin birinci və üçüncü hissələri, həmçinin 210-cu maddəsinin birinci hissəsi ilə aparılır. Həmin maddələr 2 ildən 4 ilədək azadlıqdan məhrumetmə cəzasını nəzərdə tutur.
“İstintaqla müəyyən edilib ki, təqsirləndirilən şəxslər s.s.i.p. ‘Akkreditasiya üzrə Vahid Milli Orqan – Akkreditasiya Mərkəzi’ tərəfindən akkreditə olunmuş müəssisənin adından istifadə edərək, avtonəqliyyat vasitəsini faktiki yoxlamadan, sıxılmış təbii qazla işləyən nəqliyyat vasitəsinin sisteminin və qaz balonunun yoxlanılması ilə bağlı saxta sertifikatlar hazırlayıb və satışa çıxarıblar. Həmin sertifikatlara əsasən guya yoxlanılmış avtonəqliyyat vasitəsinin qaz balonu sistemi və qaz balonu ‘Avtonəqliyyat vasitələrində qaz balonlu avadanlığın yerləşdirilməsi, texniki tələblərə uyğunluğun qiymətləndirilməsi və təhlükəsiz istismarı haqqında texniki reqlamentin təsdiq edilməsi barədə’ Gürcüstan Hökumətinin 15 yanvar 2014-cü il tarixli №80 saylı qərarının tələblərinə uyğun olub.
Hazırda istintaq intensiv şəkildə davam etdirilir və qeyd olunan akkreditə olunmuş orqan tərəfindən törədilmiş analoji cinayət əməllərinin, eləcə də bu cinayətdə iştirak etmiş digər şəxslərin müəyyən edilməsi istiqamətində işlər aparılır”, – deyə İstintaq Xidmətinin yaydığı məlumatda bildirilir.